蔡卓妍難忘初戀騰騰震

·2 分鐘文章
蔡卓妍被問到與男友的婚期即落閘:「唔好咁八卦。」
蔡卓妍被問到與男友的婚期即落閘:「唔好咁八卦。」

情侶之間,除了互愛,也要互信、互諒,才有互相感動的時刻。蔡卓妍和周柏豪說起「感動」話題,柏豪指太太多年來對他的絕對信任,令他最感動;蔡卓妍則回憶與初戀男友分隔兩地的溫馨時光。談到結婚,阿Sa直言被表姐簡單簽字的結婚方式打動,既快捷又浪漫。

蔡卓妍(阿Sa)與周柏豪2017年合作電影《原諒他77次》,反應不俗,相隔兩年,2人再合作英皇電影《感動她77次》,同樣的對手,不一樣的感覺。說到愛情路上遇過最難忘的事,阿Sa笑言:「由細到大,我都好喜歡整色整水氹人開心,記得讀中四嘅時候,初戀男友喺英國讀書,我會每一日寫信畀佢,特別日子又會送啲小禮物,你想到最老土嘅電影、電視橋段,我都會做晒!(有冇人做啲乜嘢令你好感動?)都有,都係初戀男友,因為有好多回憶,佢喺英國做兼職賺錢打長途電話畀我,記得冬天嘅時候,佢喺做嘢間餐廳出面打畀我,因為落緊雪天氣好冰,佢聲都震晒,好難忘。」

感激太太信任

周柏豪說起感動,當然第一時間想到太太:「太太對我嘅工作非常體諒、包容,令我覺得最感動,我可以無牽掛咁工作,咁樣反而令我更加想返屋企。(平時咁忙,點維繫感情?)大家互相照顧對方嘅屋企人,就算結婚之前,佢屋企人亦即係我屋企人,我會好努力照顧,呢樣嘢會畀對方睇到你係值得信任嘅。」

在戲中,有一場令人動容的婚禮場面,問阿Sa對婚禮有甚麼憧憬?她說:「參加朋友嘅婚禮,會覺得結婚係一件好浪漫嘅事,同時都幾煩,有少少驚,唔係驚結婚,而係驚搞一個婚禮。前年我表姐結婚,佢同佢老公喺中環約咗個時間,簽個名,15分鐘就有張結婚證書。件事好兩個人,又快又方便又浪漫,我唔知會唔會效法,但呢個方法都幾好。」

周柏豪與蔡卓妍再度合作,已經默契十足,相處融洽。
周柏豪與蔡卓妍再度合作,已經默契十足,相處融洽。