蔡東豪的《復原力》

(綜合報道)(星島日報報道)過去幾日，我牀頭放了一本新書，蔡東豪的《復原力》，為的，就是要了解這位老友過去一年間心路歷程，實在令人有太多、太多疑惑呀！ 去年七月底開始，直至昨天為止，仍有N加N加N加N位各式人等（由親人到老友到點頭相識人物），不停問同一條問題：「蔡東豪究竟發生咗乜事？」因個個認為小弟與Tony非常老友，冇理由唔知也。其次，當然十之八九並非真正關心蔡東豪，而是想八卦一番，嗦料後在友儕間傳出去扮「百曉生」，心態就如此簡單。 實情如何？真的，我完全不知去年中在Tony身上發生咗乜事。作為老友，小事碎料我反會八卦，因無傷大雅。大事呢，尤其可能涉及人身安全、家人安全及群眾安全者，我反而不會問，這是一個大原則，也是江湖規矩。如此重大事情，當事人想你知，一定會主動話你知，需尋求意見，亦會主動發問。否則，男人大丈夫，還是大家保持緘默，心照好了。 好嘞，「心照」咗近一年，終於，Tony約我出嚟有限度、有範圍、有節制地訴心聲，並且，親手遞來佢本新書《復原力》，意思，當然不會咁Cheap想小弟幫佢宣傳（佢寫書，第一目標肯定不為賺錢，因以蔡先生經濟能力，太濕碎了。再者，呢類書，必定不會大爆），而係「憑書寄意」，通過文字傳給老友一點不想開口講的訊息。到底，一切困苦風雨自己受晒，完全唔講，不好受之餘，分分鐘谷出奇難雜症怪病！ 認識蔡東豪二十年了，上世紀九十年代中，見佢以年輕才俊身分踩入商台，我多事，約佢出嚟，膽粗粗以「老江湖」身分指出佢即將面對的一切。中唔中？總之，結果是蔡東豪有功有勞後，不明不白被「突然死亡」式終止合約。紙短情長，有興趣知佢一年間心路歷程，睇《復原力》啦。 (曾智華 阿碌開咪) COLUMN