劉綽琪喪母喪夫疑情緒不穩暴瘦 藝人各有坎坷經歷 姜皓文未見過生父 陳柏宇住過兒童院

參選港姐而入行嘅劉綽琪，淡出幕前十幾年，最近喺社交媒體連環出post，其中一張相仲見到佢面容暴瘦，有網友留言問候，劉綽琪仲話想瘦多幾磅，令人擔心佢嘅狀況。

前年劉綽琪因為官司而現身法院。當時有報導重提劉綽琪嘅經歷︰父母離異之後，綽琪同有長期病嘅媽媽生活，但喺佢14歲嗰年目睹母親在家中逝世，自此綽琪精神崩潰，需要接受輔導，後來跟爸爸到夏威夷生活，又同繼母無法相處。劉綽琪2015年同外籍男友結婚，但係老公當時已患有淋巴癌，婚後2年不幸病逝。近年經歷喪夫及喪父之痛，劉綽琪更患上人格障礙症，一度要藥物治療。

唔少藝人都遇過人生低潮，部份處境可能比佢地嘅作品更加戲劇性。希望劉綽琪可以走出低谷！

姜皓文未見過生父 唔肯定自己係咪姓姜

TVB訪談節目《諸朋好友》搵姜皓文接受訪問，黑哥提到身世，原來佢出生前父母離異，自己未見過生父一面，更唔知阿爸而家係咪尚在人世，甚至連係咪姓姜都唔肯定，因為聽過一個講法係，拎出世紙嗰陣阿媽搵咗位姓姜嘅朋友幫手登記。

李蕙敏成年先知係養女

曾經係天后接班人嘅Amanda，細個成日被性格火爆嘅媽媽打﹐甚至Amanda出道成為歌手之後都受皮肉之苦，於是毅然離家出走，母女間有10年冇來往。21歲嗰年，爸爸告知Amanda身世，原來自己並非父母所出而係養女，頓感晴天霹靂。後來養父病逝，養母患有腦退化，Amanda負起責任照顧，母女重修舊好。

生父拋棄 黃秋生待母至孝

黃秋生父親係英國派駐香港公務員，本身有家室，結識秋生媽媽之後「搞出人命」，但係喺秋生4歲嘅時候，爸爸拋棄佢地母子。秋生講過當時媽媽餵洗衣粉俾佢食，想同歸於盡，後來於心不忍先至救得返，仲決定咬實牙關湊大個仔，所以秋生向來對阿媽非常尊敬，亦後悔年少時激親媽咪。

2017年秋生喺facebook出post尋父，消息傳到遠在英國嘅生父家人，2018年2位同父異母哥哥來港，兄弟終於相會，並透露爸爸已經喺1988年逝世，生前從未提起有過另一個家庭。

住兒童院4年 陳柏宇志願做社工

成為爸爸之後成為「女控」嘅Jason，3歲時父母離異，因為佢地無法照顧，Jason3歲入住聖基道兒童院，直到7歲先由媽媽接走，並且移民加拿大。Jason對呢段經歷非常坦白正面，提到入住期間生活點滴，少不免有大哥哥欺凌，但亦學識照顧自己，而且唔覺得童年缺少愛。Jason大專時期修讀社工系，正正因為想做協助小朋友嘅工作。

童年麥包差啲被棄養

2017年TVB嘅《關你家事》節目，主持嘉賓分析個案之餘，亦都自爆個人經歷，好似肥媽就提到被前夫家暴，而主持之一麥包（麥長青）就憶述童年時差啲俾阿嫲將佢送俾別人寄養，好在麥包媽咪堅持先至冇事。後來麥包爸爸北上工作，父子好少時間相處，成為童年缺憾，到自己成為爸爸，三代同堂有機會相處先至釋懷。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！