「蘋果廣告製作公司」廣告 越講越有古怪？

  聖誕夜黃金時間播出嘅「蘋果廣告製作公司」電視廣告，由於畫質粗糙、風格不合時宜，引起唔少觀眾注意。 當播出次數越來越多，就更多人討論，甚至成為網路熱話！   我地喺度整理下，呢幾日網友關於呢個廣告嘅討論重點︰   － 2002年底至03年過年前，電視台曾經播出過風格類似嘅廣告，同樣都係煙花背景，不過就有「世界和平，萬眾歡騰，蘋果電影」嘅旁白，而且公司名係「蘋果電影」。為旁白配音嘅，係TVB御用報幕員羅山。但未能證實上次播放時間是否尋實。－ 有人去商業登記處查冊搵到呢間公司，辦事處設於灣仔巴路士街。

－ 有人留言自認係多年前為呢個廣告做製作，而「蘋果廣告製作公司」由「周志強」開設（後有傳媒查證，應為周自強），而周自強乃周創發之弟，周創發是誰？80年代於TVB推出的「周創發廣告雜誌」，就是由周創發的公司製作。留言更指周志強可能想東山再起。

－ 有留言引述傳媒內部消息，指高層已下令不得討論呢個廣告。呢個我肯定係錯，如果係真……你點會見到呢條稿？

而網友就有以下推測：－ 個廣告唔似係宣傳呢間公司咁簡單，廣告秒數、風格同電視台一貫作風有出入，出得街係咪因為有特別原因？（小編按︰黃金時間都見過5秒奶粉廣告）－ 點解要用電視台黃金時段播一個過時廣告？有人就推斷，上次播出係「沙士」前，或者有關方面預知有「大件事」發生，用廣告通知相關人士﹐尤其係不能用電話通訊嘅人，例如在囚人士。－ 亦有推斷指，廣告秒數、畫面煙花顏色、煙花出現次數，可能係暗號。－ 會唔會係播錯片？咁點解唔止播錯一次？

－ 有人研究畫面頻譜（spectrogram）搵出一堆字母同數字(BC-5 31715)，於網上地圖找出代號所指為加拿大BC省某處地方。

  咁到底今晚仲會唔會播？似乎大家都好期待……唔知開緊show嘅劉華，會唔會特登唱返個廣告首配樂《真我的風采》？