袁偉豪加料誓詞搞喊張寶兒

東方日報
·4 分鐘文章
張寶兒雙手及頸戴上多對龍鳳鈪,與袁偉豪齊齊着中式禮服影婚照。
張寶兒雙手及頸戴上多對龍鳳鈪,與袁偉豪齊齊着中式禮服影婚照。

無綫小生袁偉豪與張寶兒昨日於7,000萬新居的會所舉行婚禮,新郎宣讀誓詞時臨時加料,大講愛的宣言,令張寶兒感動落淚!由於兩人在疫情下搞婚禮,曾有警察到場了解,不過張寶兒表示事前已諮詢法律意見,並做足安全措施!

39歲袁偉豪(Ben)去年於美國向年輕10歲的女友張寶兒(Bowie)求婚成功,今年4月更聯名豪擲約7,000萬元,購入西貢傲瀧2,000呎豪宅做愛巢。昨日兩人於新居的會所舉行結婚儀式,正式成為夫妻。他們跟足傳統,早上穿上中式禮服進行斟茶儀式,新娘子盡顯貴氣,雙手戴了3對巨型龍鳳鈪,頸上亦掛了4對,全部又粗又閃,行頭十足!由於Bowie錫住老公,故沒有玩新郎環節。

之後新娘換上白色透視婚紗,配襯閃爆巨型鑽石頸鏈進行結婚儀式,由父親陪伴下步入會場。進場一刻,Ben激動爆喊,之後進行簽字儀式,他讀出誓詞:「多謝寶兒容許我嘅任性,縱容我嘅任性,令到我呢3年嚟過得好快樂,但係我想講嘅係,喺未來嘅日子我會盡我嘅責任,喺你嘅身邊保護你。」Bowie聽後感動得淚流披面,場面感人。

警察到場了解

完成結婚儀式後,兩人手拖手步出接受傳媒訪問,並展示結婚戒指,Ben應傳媒要求先輕吻老婆臉頰,然後愈錫愈肉緊,Bowie即流露冧爆笑容,幸福滿瀉! 他們表示婚禮一切從簡,主要邀請雙方家長及朋友。提到Ben於儀式甫開始已爆喊,Bowie搶答:「我都未見過佢喊成咁!」而Ben自爆讀愛的宣言時臨時加入深情說話:「主要圍繞3年前喺非洲大草原定情,同多謝佢縱容我嘅任性。呢3年係我事業嘅春天,好多謝佢無論開心唔開心都陪住我,所以覺得係時候定落嚟,想娶佢返嚟。」他未有透露接新娘開門利是的實際數字,只表示取好意頭,又指即興清唱親自作曲的《你與你的另一半》。

婚禮期間發生小插曲!因禁聚令問題,曾有警察到場了解。問到在疫情下舉辦婚禮是否困難重重?Ben坦言:「好頭痛!今日都發生咗啲小插曲,但大家好守規矩有戴口罩。(因為疫情所以唔大搞?)其實一路都唔想大搞,晚宴方面今年都完成唔到,希望下年疫情過後再搞。(警方到場係因為禁聚令?)係,已即時處理。」Bowie補充:「我哋都降低咗賓客人數,呢度係私人地方,大約100人,之前亦有諮詢法律意見,律師亦成個晏晝陪住我哋,同埋現場都有齊探熱、搓手液,做足防疫措施。」

講明養起老婆

問到可會「雙喜臨門」宣布懷孕?Bowie笑言:「你睇我着成咁就知冇BB,我哋都唔趕生嘅。」Ben亦說:「佢都Enjoy緊工作,除非有意外啦。雙方家長當然想啦,但我哋未有生育計劃,享受住二人世界先,不過我嘅父愛都開始氾濫。」他們表示婚後正式搬入新居,但要先整理房間,又指親友於床上擺滿小朋友鞋等傳統布置,催他們生B。談到婚禮花費,Ben直言花了不少錢,但仍未計算,他強調:「錢唔係最重要,最緊要開心。」Bowie一直被指有個「富爸爸」,被冠以「億萬駙馬」的Ben表示希望喜事能帶來正能量,承諾會努力賺錢:「正式1個人搵錢,2個人使錢。」講明要養起老婆。

袁偉豪多謝張寶兒一直以來縱容,承諾婚後養起老婆。
袁偉豪多謝張寶兒一直以來縱容,承諾婚後養起老婆。
二人咀不停,Sweet!
二人咀不停,Sweet!
張寶兒由父親陪同進場。
張寶兒由父親陪同進場。


【相關搜尋】袁偉豪岑杏賢分手原因