被劉穎鏇暗戀 後知後覺 丁子朗用情專一 請女同學食檸檬

藝人丁子朗入行5年，矢志成為一位真正演員。至今拍劇十餘套的他表現漸上軌道，早前擔任港姐司儀，其「執生」能力令人刮目相看，他表示：「其實主持奧運閉幕已經試過類似情況，嗰次要爆肚拖足十幾分鐘，絕對係難忘經驗。」

談到他有份演出無綫熱播劇《把關者們》，角色切合其陽光形象，演來得心應手。他坦言感恩遇上伯樂監製陳維冠：「佢好注重『戲』，要求演員有達標嘅表現。好記得之前拍《七公主》，我見有2小時空檔，就錄影《#後生仔傾吓偈》，點知再入廠就心散，嗰場仲要係重頭戲，佢就同我講以後唔熟對白唔好入廠！咁係我衰，高估自己能力，嗰種挫敗感刻骨銘心。」

喜歡長髮女孩

丁子朗於《把》劇與劉穎鏇、孔德賢上演三角戀，他被劉穎鏇暗戀，完全後知後覺，他笑言：「依家啲愛情點會仲咁死心塌地吖？好多女仔都明刀明槍！」現實中，他自爆試過被女生示愛：「對方係我嘅高中同學，佢父母都好想撮合我哋，成日叫我返屋企食飯，當時其實我有拍拖，但佢唔介意，我同佢講大家真係唔work，結果我撮合咗佢同我嘅一位朋友。（你嘅擇偶條件？）外在嚟講我唔鍾意短頭髮，最幸福當然係可以互相扶持、一齊成長啦。」