【被指劈腿】《全民造星》入行 被嘲「八両金」吳保錡入ERROR有運行

今日有報導踢爆，Viu TV搞笑組合ERROR成員吳保錡同網路女神沙律（張沛樂）去元朗拍拖睇紅葉，二人冇否認戀情。但係隔一陣就有傳媒搵到據稱係保錡女友嘅model Carrie，佢話同保錡未分手，去年十月仲一齊慶祝生日，只係男方最近態度冷淡，惹來保錡偷食做「賤男」疑雲。

今個月就30歲嘅保錡，2018年因參加《全民造星》而為人認識，同屆參加者有姜濤、陳卓賢及盧瀚霆(Anson Lo)等。保錡喺《造星》之前已經入行，拍過《奇緣灰姑娘》及《男人唔可以窮》等電影，不過星運平平於是轉做幕後。

玩《全民造星》被嘲「八両金」 窮到俾女飛

保錡參加《全民造星》殺入20強，輪排名比後來加入MIRROR嘅成員更高，但係表現未算突出，反而最有印象嘅係被網友嘲笑佢似八両金，保錡話嬲到瞓唔著！而喺《造星》節目入面，保錡哭訴因為參加比賽冇收入，搞到冇錢買禮物俾女友導致分手，估唔到2年過後變成「女神收割器」！

比賽過後，《全民造星》監製花姐將保錡連同其餘幾位《造星》參加者何啟華（阿Dee)、梁業（肥仔）及郭嘉駿（193），打造成搞笑組合ERROR，可算係同樣由《造星》參加者組成嘅MIRROR兄弟團。雖然風格騎呢，但係演出機會唔少過MIRROR，包括同埋花姐出埠拍攝兩輯《花姐ERROR遊》，又試過喺旺角麥花臣場館開talk show。

MIRROR喺叱咤威到盡，ERROR儘管冇獎，但係連續2屆喺「我最喜愛的組合」打入7強，單曲《我們很帥》喺多個流行榜拎到三甲，加埋仲有唔少代言廣告，人氣算唔錯，希望保錡嘅疑似三角戀新聞唔會影響ERROR啦。