觀塘 76 歲鐘錶匠爭取六年喜獲工匠牌 駿業里橋底擺檔：人生第一次爭取到啲嘢︱Yahoo

【Yahoo新聞報道】76歲鐘錶師傅佘永盛於觀塘裕民坊一帶擺檔近30年，向食環署爭取工匠牌照多年，觀塘區議會食物環境衛生委員會今日（16日）開會，通過發牌事宜。佘先生終獲食環署發出固定攤位（工匠）小販牌照，成為首位成功自行申請工匠牌的工匠，預計11月可於駿業里開業。佘先生稱「好高興」，9月14日生日的他形容工匠牌是「最好嘅生日禮物」。

佘永盛早在40年前已從事鐘錶行業，政府在2009年舉辦單次工匠普查時，他因家事離港未能參與，最終未獲登記，在裕民坊重建後成為「三無工匠」（無登記、無牌照、無安置）。過去六年他爭取成為工匠之路甚崎嶇，協助佘先生的民間團體「活在觀塘」曾網民求助，收集2009年至2011年期間佘在觀塘開業的照片及證據，更引用2010年煞科的電影《殺破狼II》片段，證實他在工匠普查時已在裕民坊經營鐘錶維修業務。

周旋六年「好辛苦、好難過」

為工匠牌照周旋六年終見曙光，佘稱「好辛苦、（呢幾年）好難過」，如今「人生第一次爭取到啲嘢」，現時心情興奮，「做咩事都要堅持，堅持爭取到最後一刻......如果咁樣都放棄，人生就無意思，革命尚未成功，同志仍需努力」。於9月14生日的他，形容議決是「遲來的生日禮物、係最大嘅生日禮物」，希望任鐘錶工匠「做到唔識做為止」。新址將搬往駿業里橋底，「都無計啦，都唔係你想點就點，有好過無啦」。

對於政府已「落閘」不再為他人發牌。佘對於未能幫到其他工匠續牌感失望，強調「我哋係為市民服務，又唔係牟取暴利」。他本人也希望工匠牌可交予比他年輕20多年的妻子。同樣懂得修理鐘錶的佘太指，希望工匠牌有繼承權，因佘生年事已高，「佢而家養我，第日佢退休就我養佢」。佘就寄望兒子努力讀書上大學，暫未有教兒子維修鐘錶，「唔使咁辛苦喺度日曬雨淋」。

佘70年代末來港後學習鐘錶維修，形容以前鐘錶屬奢侈品，「啲人好渴望（擁有）！」佘現時於觀塘裕民坊舊址附近擺檔，近月天氣炎熱多次幾近中暑暈倒，要到商場避暑。由於未正式獲發牌，多次被指是無牌小販而被判罰。曾陪伴上庭的佘太就向記者指，不少法官了解到佘正等待發牌，並無判處巨額罰款，但他們每單生意僅數十元，每月二、三千元罰款也是負擔，「有啲法官都叫我哋搵區議員幫手，睇吓可唔可以豁免，可以喺度開檔」。

熟客：支持有手藝嘅人

熟客唐小姐幫襯佘先生約7、8年，形容佘生獲發工匠牌是好事，「支持佢哋呢啲有手藝嘅人，希望可以傳揚落去。而家修錶嘅人真係好少，佢小本生意，（換電）收幾十蚊維持自己生計。」路經佘先生鐘錶檔的街坊王太說，其丈夫曾幫襯他換錶帶、換電池，有留意他爭取工匠牌的新聞，「梗係高興啦！承認咗佢係一個工匠吖嘛！有技術嘅人點解唔畀個牌佢呢？」王太正打算將家中損壞的浪琴錶交予佘先生維修，「40幾年喇，我先生送畀我㗎！」她亦會向街坊宣傳佘先生移至駿業里橋底營業的消息。

「活在觀塘」創辦人袁智仁與余先生等工匠在區議會會議前提交建議書，希望改善申請工匠機制，讓工匠傳承手藝，並在會上旁聽會議。觀塘區衞生總督察周勁梅回覆面積計算準則時稱，5月17日曾到駿業里檔口量度佘先生的工作檯面積，獲佘同意。至於日後會否再增工匠牌，周指此為特殊個案，強調2010年5月21日後「我哋就唔會再發任何小販牌照」。議案最終在無人反對下通過。

據區議會文件所示，佘獲分的固定攤位在觀塘道 410 號駿業里行人天橋底旁行人路，面積將不得超過0.4米乘0.5米，另須繳付每年牌照費和攤位費用合共 3,458 元。八個政府部門包括消防處、香港警務處、運輸署、地政總署、路政署、渠務署、機電工程署和民政事務總署，以及港鐵均對此經營地點不持異議。

「工匠離開咗街道就無生命」

袁智仁指出，工匠牌照屬小販牌照並無繼承權，現時不少工匠已年過70 ，希望政府可考慮手藝傳承問題，令工匠牌照獲繼承權，讓親屬或助手延續手藝；九龍城、深水埗等即將重建，或有更多工匠面對同樣問題，希望食環署可再做工匠調查，檢討工匠牌申請程序。袁多年來協助佘爭取工匠牌照，過去三年每月與食環署開會討論。他感慨「工匠離開咗街道就無生命」，面對觀塘重建變天，「好多租客走咗、住客走咗、舖頭走咗，係工匠有機會留得低喺度......如果連佢哋都走埋，咁觀塘就只會變成一個港鐵站嘅名字，唔係我哋熟悉嘅社區」。只要佘生堅持爭取，「我哋就同佢一齊走落去」。