訪台灣遊客第一季數字大跌 大陸客跌但韓國客暴升

香港人最愛嘅目的地之一台灣，踏入2017年就開始不斷叫苦，因為有政治因素，令大陸赴台旅客不斷下跌，業界都不停叫苦。近日台灣政府公布第一季訪客數字，1月至3月赴台旅客人數為253萬，比2016年同季少咗28萬人！當中大陸客下跌最勁，跌咗42%，成66萬人。至於日本旅客人數不變；反而韓國旅客因為大規模宣傳之下大增34%，同時東南亞嘅旅客亦升咗36%！不過由於大陸遊客人數多，而且消費力強，一直都係經濟支柱，就算韓國同東南亞旅客升都彌補唔到經濟損失喎。但其實係咪真係咁呢？其實根據觀光局嘅數字，可以拍得住大陸旅客嘅消費水平嘅仲有一班人，就係日本旅客，平均每日使費達227美金；反而韓國就只有205美金。所以台灣業界都表示，希望政府除咗向韓國宣傳之外，更應該加強對日本嘅宣傳喎。其實對我哋香港旅客嚟講，去台灣你想見到好多大陸旅客，定好多日韓旅客呢？宜家呢個方向，似乎對香港人嚟講，係一條好路喎，有去趁早！

台灣第一季大陸旅客勁跌42%，少咗66萬人。

（Breathtakingdestinations@tumblr）

由於對韓國嘅大力宣傳，韓國人客急升34%。

（Breathtakingdestinations@tumblr）

原來日本旅客同樣係高消費一族，同大陸客有得比。

（Jingeyes@tumblr ）

相關文章：

去旅行現真身？ 四大「公主」特徵嚇親另一半

東京自由行|文京繡球花祭

「失敗博物館」 展出全球失敗產品 咖啡可樂你見過未？

【立即讚好】全新 Yahoo 旅遊 Facebook 專頁
Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！