許濤急召全台藝人返TVB開大會 《愛．回家之開心速遞》停拍不停播？

早前TVB公布上半年業績，宣稱扭轉近年形勢轉虧為盈。而今日有傳媒指，尋日TVB行政主席許濤急召全台合約包薪藝人返電視城開會，令外界估計TVB係咪有大動作。

根據報導，許濤會上呼籲藝人發展內地市場，而TVB將會延續近年方向，與內地平台合作推出綜藝節目同劇集。負責藝人管理嘅TVB副總經理樂易玲回應傳媒時承認的確有同藝人開大會，主要係交代公司發展方向，例如合拍劇嘅宣傳方針等。

除此之外，消息指TVB同時作出兩項改動。首先劇集嘅劇本需要提高質素並獲審批先可以開工拍攝，因此有劇集需要停拍執好劇本，當中包括收視保證嘅《愛．回家之開心速遞》。但由於《愛》一早拍定唔少存貨，因此影響唔大。另一變動就係TVB官網藝人頁面，比起舊版只得藝人簡介同大頭相，新版有齊藝人演出劇集角色、獎項等資料，儼如維基百科。而藝人排位唔係跟姓名筆劃或英文名開首字母排序，可見藝人地位，當中近年屢傳被雪嘅視后李佳芯喺正第一排，似乎印證Ali嘅地位。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！