許生許太被批雞年添丁 Sammi斬釘截鐵：做戲先會出現

【星島日報報道】唔少圈中人都係高齡產婦，林青霞、吳君如、李嘉欣、黎姿、徐若瑄、劉若英等等，醫學進步加上身體機能Keep得好，一樣可以安心佗B。 現年49歲的蘇永康與39歲的老婆馮翠珊（Antia）去年成功造人，好友升呢準爸爸，Big Four成員之一的許志安與許太鄭秀文（Sammi），都經常被問及何時生B。雖然許志安49歲，鄭秀文現年44歲，依然可以造人無難度，正如蘇永康「老來得子」。 日前命理師傅吳佩孚作客網台節目《恐怖在線》，批算許志安、Sammi於今年雞年，即丁酉年，有機會生B！他在節目中說：「丁酉，丁又代表『許』字，有個午字即係丁，酉代表『鄭』。許志安鄭秀文，佢合住咗，會有添丁情況，鄭秀文今年有可能添丁。」主持人潘紹聰即問「係咪會生㗎？」吳佩孚：「唔知㗎，你睇蘇永康都有BB。（你啲Friend喎，有冇幫佢做過啲野？）呢樣唔講啦，得償所願，佢想做老竇好耐啦。」究竟係真唔係？命理之說信則有不信則無，如果許生許太升呢準爸媽，相當唔少人都戥兩位開心。 似乎推算都傳到Sammi耳中，她在Instagram留言有感而發，上載擺弄BB用品的劇照，明示自己唔會生B：「假如有天我懷孕，呢d（啲）bb野就變得意義非凡。 不過，呢個世界係冇咁多假如。所以，都係做戲先至會出現呢一個畫面。」粉絲就唔多認同Sammi，祝福佢懷孕，更指「好想睇你個B∼一定好靚」。

睇更多