談事業 講愛情 余德丞:我好運!

東方新地 - 娛聞
東方新地

前香港游泳代表隊成員、無綫新晉小鮮肉余德丞(Dickson)近日已從昏迷中逐漸康復,並同好友劉佩玥在IG上開心互動。入院前Dickson接受本刊訪問,被指為靚仔高大有家底,是真正高富帥,並備受無綫力捧、極速上位嘅佢,在訪問中大談事業發展,並親身拆解其家境、緋聞等問題⋯⋯

撰文:東方新地|圖片:新傳媒圖片庫、余德丞IG

延伸閱讀:

體感40度 蔡少芬 張晉 爆汗陪女

靚樣廿多年不變! 米雪 美魔女始祖

余德丞 幕後走到幕前

余德丞坦言細個夢想係做足球員,入行係因為TVB四年前請人做2014世界盃,問佢無經驗,TVB點解會請佢?余德丞笑言:「人工低!唔係,因為對體育充滿熱誠,我最初入公司係做寫稿記者。係開心嘅,但呢個都係我想轉做幕前嘅原因,因為我既然寫埋稿,咁點解我唔自己講埋?我咪自己出埋鏡。」問佢點由幕後轉去幕前?「佢本身請我係想我做幕前,但我對自己冇咩信心,申請咗做幕後,到我想申請做幕前,自然容易啲。」點睇《體育世界》停播?余德丞直言:「慘啲囉,因為我一三年七、八月入公司,嗰時入去就係做體育,班同事由一三年相處到依家,好多大型賽事一齊做,有啲可惜、傷心囉!」歡送會當日有無依依不捨?「都係影張相、食個飯,都係形式嘢嚟啫,但如果第日有機會幫到手咪再幫吓囉!」

余德丞
余德丞

想做足球員,點解會加入香港游泳代表隊?余德丞表示:「我好細個有做兩樣運動,游水同踢波,兩樣運動發展落去,發現游水嘅成績好啲,就專注咗游水,但踢波我都好鍾意,所以由細到大都有踢波同睇波,所以我依家都係一個足球評述員嚟㗎!(笑)」游水最好嘅成績係點?「我游水最好嘅成績就係代表香港參加過青少年奧運會,但未有資格參加亞運同奧運會。」但入咗TVB,反而有機會去巴西奧運,嗰次好興奮?余德丞直認:「係,因為我自己運動員嘅夢想都係去到奧運呢個大舞台,但係我未有資格同能力去奧運,我都希望可以用另一種模式去參加奧運會,我自己可以去到一六年嘅里約奧運會做採訪,其實我係好開心,最緊要見到一班香港運動員,曾經都出生入死訓練過,見到佢哋成功同得到認可,係一件好開心嘅事,都總算圓咗自己心願。」

Dickson Yu 余德丞(@yuduck)分享的貼文 於 PDT 2018 年 7月 月 15 日 上午 4:25 張貼


條路好運又平坦

去完奧運,有咩體會?「首先見到好多世界各地嘅傳媒,見到開幕禮同閉幕禮淨係綵排都用兩日由朝到晚,見到當地嘅人有幾瘋狂,好少睇場足球或者游水比賽,感受到咁嘅氣氛,另外,節目廣播嘅規模,媒體中心好大,啲人出出入入、點樣set up衞星⋯⋯所以成件事係一個見識。」去完里約奧運,返嚟就開始拍劇?「係,返嚟就接咗《誇世代》,嗰時監製都同我講:『你喺嗰邊如果無中寨卡 (病毒),就返嚟拍劇啦!』當然佢同我講笑,但都係幾大嘅轉變嚟。」入行到依家,覺得自己發展點?余德丞笑言:「我諗用兩個字去形容,係好運!我諗比起好多藝人同事嚟講,條路嚟得好運同平坦啲,一開始體育節目,跟住兒童節目,之後有得做世界盃,跟住奧運,之後有機會拍電視劇,去發展一下,最近仲有一個旅遊節目,途中仲有飲食嘅節目,好開心、好好彩公司畀我做我鍾意做嘅嘢。」


講開拍劇,《誇世代》係將所有嘅focus擺喺除衫戲同埋余德丞嘅四十二吋胸肌度?「唔係,都有坤哥 (吳業坤)、麥明詩、張繼聰、森美,都好紅吖,有人focus其實我當初都估唔到,因為監製本身想我游水,都係希望係我好勝任嘅嘢,我會容易做啲,都係想畀我容易啲handle嘅嘢畀我做,都估唔到會有咁嘅效果。我諗能夠有一件事畀人認得你,都係好事嚟嘅,當然件事唔好太負面啦,講真我游水成日都係咁㗎啦,所以我唔覺得有咩大件事,著條泳褲游水好合理啫,無理由著件潛水衣去游水㗎,當其時我亦都無諗咁多,OK啦、正常嘅一件事。」依家啲劇,成日要除衫?「我覺得就唔使除咁多,我唔係太鍾意將焦點擺喺身材上,反而大家可以欣賞吓我啲爛gag,雖然我知大家都唔太欣賞,哈!或者欣賞吓我嘅內涵,可能我會仲開心啲,好過不斷留意我胸肌四十三定四十六吋。」

余德丞
余德丞

余德丞又透露:「最近啱啱拍完民初劇《危城First Lady》,合作嘅係松松姐姐 (陳松伶)、阿Ben黃智賢、徐榮、江嘉敏同陳瀅,應該年尾會播,我做一個爛撻撻嘅車夫,有查案情節,後尾會變咗做西裝骨骨嘅管家。」車伕咪又唔著衫?「熱啲啦,但未必唔著衫㗎嘛,你去到天星碼頭見到以前啲車夫都有著衫啦。」年尾播,通常年尾都係頒獎禮爭獎時期,問余德丞對獎項有咩睇法?「其實由頭到尾,我由做運動員開始,獎項對我嚟講都唔係一件咩嘅事,因為做運動只要快過自己,就係好開心嘅事,攞唔攞到獎唔係好大嘅問題。有咪bonus,無都要繼續做㗎啦,到時就算佢唔畀獎你,但全香港都認同你嘅時候,都係一個成就嚟嘅!但我覺得唔使諗到咁遠住囉!」


郭富城鄰居

通常新人都要捱窮、捱餓,或者銀行存款攞唔到一百蚊出嚟,但余德丞名校出身、屋企又幾富裕,應該唔使過呢啲日子?佢話:「又未去到一百蚊都無,未去到農夫首歌搭地鐵都唔夠錢、要用特惠 (車票),但都係自己賺錢自己使,同埋如果得嘅話,由大學畢業出嚟,每個月賺嘅人工,我都有畀家用,因 為我覺得係一個男仔對屋企嘅責任。」好多人對余德丞嘅家底有興趣,話佢係郭富城嘅鄰居、屋企係做物流生意?「我的確係郭富城嘅鄰居,因為大家都係住同一棟大廈,其實仲有周秀娜㖭,哈,不過家底方面,屋企人其實唔係太鍾意我講屋企啲嘢,但話做物流生意,其實又唔係,都係打工啫。」

余德丞
余德丞

問余德丞自細點理財?佢表示:「細個屋企人會畀零用錢,嗰時其實都有個習慣,就係比較鍾意儲低啲錢,我投資方面唔係好叻,但我都鍾意畀番家用屋企人,如果屋企人想做投資就投資,講真嗰句,去到最後,佢哋又唔會害我、想謀我啲錢㗎,所以我覺得錢嘅嘢唔使睇到咁重,同埋我唔係太大使嘅人嚟,你見我成日畀人影到都係就咁著件tee,講緊都係五十蚊,當然有需要使嘅時候當然會使,尤其是買波衫,買波衫好貴,印埋名要成千蚊一件。所以我其實都想開一間賣波衫嘅舖頭,都係我一個夢想嚟,但好多人話賣波衫嘅舖頭要壓好多貨、好容易蝕錢,所以我最近都諗緊可能喺日本搵代理攞貨、點搞盤生意。」

余德丞
余德丞

講到余德丞係獨仔,問屋企人對佢有無期望?入行到依家,有無畀壓力佢?余德丞否認:「屋企人無同我講過希望我飛黃騰達賺幾多千萬,亦都冇乜畀壓力我,最緊要我做得開心,同埋唔好畀人呃,哈哈!因為我個人比較天真一啲,由細到大由華仁小學讀起,同學都係嗰班,一路到大個,屋企人就提醒未必個個好似你咁攞 個真心出嚟對人,可能有時都要提防一下,呢個都係佢哋對我嘅忠告,同埋希望我做自己開心嘅嘢。」有無見到娛樂圈陰暗面?「我又無見到陰暗面,但我當初同屋企人講想轉做幕前,佢哋都會有擔心,佢哋都聽過娛樂圈係五光十色嘅一個地方,所以都提醒我知道自己想做乜,如果目標係好清晰,都唔會受到其他嘢影響嘅。所以依家做做吓,佢哋都放心咗。」

Dickson Yu 余德丞(@yuduck)分享的貼文 於 PST 2017 年 12月 月 25 日 上午 12:39 張貼


緋聞好合理

提到余德丞啲緋聞file都幾厚!由麥明詩、港姐劉穎鏇 (Tiffany)、江嘉敏到蔡思貝,同佢合作過都有新聞出,余德丞笑言:「係囉,點解會咁嘅呢?係咪因為我襯到佢哋定佢哋襯到我呢?哈!我唔知喎,咁啱得咁橋咋嘛!哈哈哈!你諗下拍劇對住佢成三、四個月,一齊食個飯都好合理吖,畀人影到亦都無辦法啦,所以成件事其實都係⋯⋯無辦法囉!我都係一笑置之,哈哈,好輕鬆嘅方法應付。因為又唔係有啲咩事,使咩尷尬或者咩,唔需要吖,唔通為咗驚影相就唔食飯咩?又唔會吖,所以我都係以平常心去面對。所以可能因為咁,我咪次次都畀人影到,我就係次次keep住去食飯,就係咁畀人影到 嘞。」

Dickson Yu 余德丞(@yuduck)分享的貼文 於 PDT 2018 年 4月 月 25 日 上午 5:24 張貼


傳過咁多個,邊個係真、邊個係假?「全部都係假㗎,全部都係好同事同好朋友,如果唔係就唔會一齊食飯啦,如果有尷尬就唔會食飯啦,如果真係想收埋,亦都唔會出嚟食飯啦,係咪先?所以都係正常食餐飯啫!」咁真嗰個係咩類型呢?「你意思我希望真嘅另一半係咩類型?我覺得開朗係好緊
要,唔好成日愁雲慘霧咁,比較開朗啲,同埋我鍾意食嘢,所以我希望我嘅另一半同我一樣,都係鍾意食嘢。唔好呢樣又唔食、嗰樣又淨係食一啖,咁就唔好。因為食嘢係好開心嘅一件事。」

Dickson Yu 余德丞(@yuduck)分享的貼文 於 PST 2018 年 1月 月 11 日 上午 4:46 張貼


「港姐收割器」唔威

余德丞直言自己目前係單身,問佢有無人想追?佢話:「依家唔好嘞,都係工作為先囉!但如果有一個啱,咁都OK嘅!講真做藝員,時間比較難控制,兩、三日前先知自己使唔使開工,所以依家做嘢先啦,同埋我依家28歲,如果都未發展到自己嘅事業,就係一件大問題,所以盡力去嘗試多啲唔同嘅嘢, 睇吓觀眾鍾意啲咩。」點睇被指為「港姐收割器」?係邊本雜誌咁寫?「我唔記得邊本,唔通要裱起佢咩?」威嘛!「如果真係威,下次叫年宵夜市整啲咕𠱸,寫『港姐收割器』,咁真係威嘞!哈!」

Dickson Yu 余德丞(@yuduck)分享的貼文 於 PST 2017 年 12月 月 17 日 上午 7:00 張貼


同蔡思貝夾

而講到余德丞主持旅遊節目大家都讚好,問佢節目中嘅gag係咪自己度?余德丞直指:「啲gag全部都係我同Sisley (蔡思貝) 兩個自己度嘅,因為我哋去之前都有傾過,我哋諗點樣用輕鬆啲嘅方法,成件事可以開心啲、得意啲,但我好衰,好多時收埋啲gag到真嗰下至用出嚟,咁啲反應就會再真實啲。好在呢個拍檔記嘢能力都幾高,通常我個人有少少專注力失調症,你叫我背好多嘢,我背唔到,有啲硬資料佢都幫我講咗,一個好清晰明確嘅分工,同埋我哋嘅性格啱啱好可以做到呢件事。我同佢性格好似,都係好直嘅人,有咩唔啱都會講,佢初頭都對我啲爛gag好抗拒,但後尾覺得唔係喎、都幾好笑,就接受咗件事,個默契好快就建立咗,同埋佢影出嚟都幾靚女吖!」

Dickson Yu 余德丞(@yuduck)分享的貼文 於 PDT 2018 年 7月 月 29 日 上午 5:23 張貼


最後講到余德丞身形非常之好,問佢做幾多運動?佢答:「講真由細到大都做運動,但入咗行真係少咗去游水,依家做gym同踢波比較多啲,大概一個禮拜最少做兩次,得就三次,跟住踢一、兩次波,仲有跑步囉!跑步會練到氣同心肺功能再好啲,得嘅話夜晚會再跑吓步。但如果你明知嗰套劇係要展示你嘅身形畀觀眾睇,嗰輪就要再操多啲、再弗啲囉!但唯一一個好大嘅障礙就係我唔鍾意節食,好多人會選擇淨係食雞肉、菜,去再收緊啲線條,但我就唔鍾意,因為始終我覺得食嘢係好緊要嘅一件事,所以我從來都唔會節食。」

Dickson Yu 余德丞(@yuduck)分享的貼文 於 PDT 2018 年 4月 月 2 日 上午 12:59 張貼


訪問後余德丞即到南華會做gym,有興趣見男神甚至看男神操肌的讀者,現在知道門路啦。

Dickson Yu 余德丞(@yuduck)分享的貼文 於 PDT 2017 年 6月 月 26 日 上午 5:06 張貼


陽光暖男的外表,經常大晒42吋胸肌,是名副其實的童顏巨乳,但余德丞話:「我唔覺得自己好大隻,我亦唔希望變得好大隻,絕對唔係『The Rock』(荷李活動作巨星狄維莊遜) 嗰啲類型,我游水出身,可能修身啲,唔係爆肌嗰種。」

Dickson Yu 余德丞(@yuduck)分享的貼文 於 PDT 2017 年 8月 月 22 日 下午 9:17 張貼


做過DJ,入無綫後最初被派任體育節目主持。

余德丞
余德丞

入行前為港隊泳將。

余德丞
余德丞

於《誇世代》做回自己,演高富帥,當然唔少得晒健碩身材。

余德丞
余德丞

訪問時的小插曲,當說到「攞唔攞到獎唔係好大嘅問題」時,余德丞突然說:「但佢炒飯就好似係好大嘅問題,啲聲好似唔係收得好好!」原來他留意到餐廳廚房傳出的炒菜聲,當告訴他不影響收音,他說:「對唔住,我係一個主持,習慣留意周圍嘅嘢,哈哈!」

余德丞
余德丞

緋聞名單極厚,被拍得跟麥明詩一杯雪糕兩份食,被傳假戲真做。

余德丞
余德丞

夥拍蔡思貝主持旅遊節目《緬甸奇幻旅程》,網民大讚自然又貼地,人氣進一步攀升。

Dickson Yu 余德丞(@yuduck)分享的貼文 於 PST 2018 年 1月 月 25 日 上午 3:32 張貼


問到自幼就讀名校華仁,成績是否同樣頂尖,他卻不卑不亢輕描淡寫:「學校勁啫,唔代表我個人勁,OK啦,過到關、入到大學囉!」

Dickson Yu 余德丞(@yuduck)分享的貼文 於 PDT 2017 年 7月 月 4 日 上午 3:09 張貼


訪問中,愛笑余德丞經常瞇起一雙眼,臉上堆滿如太陽般燦爛溫暖笑容,加上思路清晰轉數快、風趣幽默及爽朗笑聲,足以用可愛爆燈來形容,且有禮貌得連對工作人員也連聲道謝,有條件又識做人,難怪極速走紅。

余德丞
余德丞

【延禧攻略】原來唔識跳舞? 皇后秦嵐 跳「洛神舞」靠演技搭夠

秦嵐
秦嵐

【延禧攻略】三大女主角 你最鍾意邊個?

延禧攻略
延禧攻略

【延禧攻略】清朝妃嬪化妝服飾神還原!于正:這不是咬唇妝

延禧攻略
延禧攻略

《延禧攻略》眾妃爭寵 邊個先係皇上最愛?

延禧攻略
延禧攻略

【特技人】自認負面新聞多 傅嘉莉:個角色同我好相似!

傅嘉莉
傅嘉莉

【特技人】打沙灘排球 朱晨麗著泳衣跳住玩波

朱晨麗
朱晨麗

延伸閱讀:

雞排妹慶祝IG粉絲達30萬 無碼素顏浴照益網民

你可能還想看