變「Encore之王」 埋單有排計 張敬軒獲姜濤餵薯條 獨享福利罰5萬

姜濤親自餵軒仔食薯條,此情此境,令不少粉絲得個恨字。
姜濤親自餵軒仔食薯條,此情此境,令不少粉絲得個恨字。

《張敬軒THE NEXT 20演唱會》前晚獲「人氣王」姜濤驚喜現身擔任嘉賓,與軒仔對唱之餘更負責餵食,炒熱全場氣氛。軒仔最後4度現身Encore,更跪地感激觀眾的愛戴,場面笑中有淚。由於超時演出關係,估計這晚將會被罰5萬元!

早前網上有人訛稱男團MIRROR成員姜濤於5月14日擔任軒仔演唱會嘉賓,企圖炒黃牛飛謀利,當時有關方面已即時作出澄清,以免歌迷被騙。而近日行蹤成謎的姜濤前晚突然現身紅館,「真.擔任」軒仔的個唱嘉賓,出場前他與組合ERROR成員肥仔(梁業)坐在觀眾席,已引起粉絲注意。而姜媽媽亦與友人捧場,期間被不少「姜糖」發現邀合照,其他捧場嘉賓還有蘇永康及洪永城等。

軒仔全程落力獻唱,直到他介紹姜濤出場時,粉絲未聞嘉賓名字已尖叫連連!軒仔先說:「幾年前識咗個朋友,大家交換電話又係網友,佢畀我感覺好怕醜。佢每次問我問題,都係關於唱歌同音樂,令我最感動係佢會將啱啱拍好嘅MV、錄好嘅新歌畀我聽。佢一路未停過令自己進步,我覺得佢好叻、有鬥志,亦懂得將勤補拙。我當時回咗佢一個訊息話:『加油呀,我買你贏!』」當介紹合唱歌時,軒仔又打趣:「隻歌推出嘅時候,佢都未出世。」繼而姜濤出場,兩人合唱《斷點》。

當眾鼓勵「怕醜仔」

合唱後軒仔取笑姜濤仍是很怕醜,令姜濤只懂笑住講多謝,定神後才表示:「記得前排有黃牛話我會做嘉賓,嗰時未有呢件事,我就諗不如將錯就錯。」軒仔亦說:「姜濤係一個好得意嘅男孩子,每個同佢合作過嘅前輩都鍾意。你一定要加油,你睇今晚現場觀眾歡迎你個聲勢,相信離你個唱唔遠喇!」全場再次起哄。

期間姜濤捧出「漢堡包薯條」送給軒仔,令忍口多時的軒仔「嘩」一聲,姜濤更親自餵軒仔食薯條,軒仔即得戚表示:「呢啲福利得我有!佢仲為咗今晚演出重新排舞。」姜濤緊接獨唱《Master Class》,當他落台後,軒仔有感而發:「見到佢哋,不得不承認自己係前輩,都心痛佢哋嘅工作,祝MIRROR所有成員星途更加燦爛。」

「放假」前夕跪謝歌迷

尾聲時,軒仔兩度Encore後,歌迷久久不願離去,更搞笑提醒軒仔「聽日你放假」,軒仔遂再次出場,期間在台上執獲Bra帶,相信是女Dancer留下,他搞笑說:「我落去還畀佢哋,點會貪呢啲嘢!」最後他四度Encore,全晚演出以《老了十歲》作結,更下跪向全場粉絲答謝。踏入凌晨12時演唱會正式完場,是晚保守估計超時被罰款約5萬元,而每晚演唱會情況類同,故相信完成全部共26場演出後,罰款或高達7位數。另外,剛與MIRROR另一位成員Frankie分手的女舞蹈員Hei前晚亦有演出,如常與其他舞蹈員演繹爆喊表演環節。

軒仔與姜濤合體,紅館舞台上的顏值超晒標呀!
軒仔與姜濤合體,紅館舞台上的顏值超晒標呀!
姜濤為擔任嘉賓,精心再編舞表演。
姜濤為擔任嘉賓,精心再編舞表演。
張敬軒
張敬軒



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能