買餸邊度好？全港街市尋寶

平時幾咁鍾意做「無飯家庭」都好，秋冬時份呢啲打邊爐、BBQ、造節旺季，要買新鮮靚料，點都要去街市行一轉！如果樓下得超市買得唔夠過癮，就要mark低呢份藏寶圖！

多、靚、齊－九龍城街市

或者因為附近中上等住宅區多（如廣播道、九龍塘、亞皆老街），九龍城街市餸菜價格未必最平，但質素點都有返咁上下。新鮮雞、手切肥牛、海鮮都有揀手貨，行過菜檔蔬菜都執得靚靚仔仔。而且周邊商店同樣多元化、上海南貨、高級生果、潮汕魚蛋、素食、入口高級凍肉一應俱全。如果要打邊爐，呢度肯定一次過買得晒所需材料。

頂樓嘅熟食市場都係不容錯過，日頭嘅茶檔「樂園」同夜晚嘅沙爹火鍋、泰國菜都相當有水準。

仲有一個賣點︰唔少人喺度撞見過發哥買餸！想同佢瘋狂selfie，記得睇實有冇一個6呎高著黑衫嘅男子行過～

地址︰九龍城衙前圍道102號

香港築地－楊屋道街市

邊爐旺季去楊屋道街市，記得要揀啱時間︰一係就朝早八九點，唔使同人迫；或者下午一點兩點，漁船返貨多新鮮嘢。叫得「香港築地」，就知海鮮檔陣容幾咁犀利，地下全層都係！貝類、魷魚、海魚樣樣齊，偶而有些少見或下價海鮮，想試新嘢不妨問下老闆點炮製，隨時有驚喜！

地址︰荃灣楊屋道45號

一個字︰平－北河街街市

草根社區嘅街市，價錢點都相宜啲，但係質素不錯，尤其是2樓菜檔，據講菜價可以平其他街市2－3蚊一斤！因為平，唔少外區居民都嚟買餸，好旺場！想再平啲嘅，過多一個地鐵站嘅保安道街市，食材價錢都係好抵，但選擇相對地少。

地址： 深水埗基隆街333號

電車直達－春秧街

北角向來多福建人，座落呢區嘅春秧街自然有福建食品店，買餸之餘仲可以試下地道閩式小食。此外，春秧街亦有一家椰子香料行，主打新鮮椰汁，買嚟整咖喱最啱。不過最具代表性嘅，應該係駛過路中心嘅電車。

食飽再買－大埔墟街市

大埔本來就多美食，淨係粉麵店，你問呢區街坊魚蛋粉同牛腩邊間最正，個個都有唔同心水！可能因為咁，大埔街市嘅賣點，可能係頂樓熟食中心。一早就已經好墟冚，最出名當然係區外人都慕名去食嘅豬扒麵，大大件即炸夠新鮮。而街市入面亦有間區外人都要專程貢入去幫襯嘅凍肉鋪，以批發價做街坊生意！而且肉類丸類選擇多，最啱BBQ前入貨。去之前記得2樣嘢︰清定屋企個雪櫃，因為不自覺會買好多；同埋check下有冇開鋪，有時星期日係唔開門嘅！

地址： 大埔鄉事會街8號

行完街去買餸－鵝頸街市

銅鑼灣，買衫買鞋就話啫，買餸？唔止得高級超市嘅。放咗工或者放假行完街食完tea想煮餐飯，去呢度就fit晒。位於時代廣場側邊，一過天橋底就有好幾檔生果、海鮮檔，行入啲就係鵝頸街市。街市裡面有印度香料店、清真肉食、改衣店，新奇有趣。頂樓都係有熟食中心，最出名嘅有車仔麵（個牛雜一流！）、燒鵝同埋咖喱牛腩，午市時份真係人山人海！

地址︰灣仔寶靈頓道21號

大陣仗－旺角街市

喺亞皆老街近大角咀嘅舊旺角街市其實已經關門大吉，但係附近廣東道、奶路臣街一帶有唔少地鋪賣新鮮食品，尤其郎豪坊後面嘅一段奶路臣街，堪稱「海鮮街」，連餐廳大廚都嚟入貨。再落多一個街口嘅廣東道，沿住向油麻地方向行，就有粉麵廠、荳品店以及路邊攤檔，冇咁多人，慢慢揀都得。

地址：旺角亞皆老街、廣東道交界（近朗豪坊）