賴彥妤訪問郭富城問完又問 被網民轟無帶腦返工 郭富城回應：我頭先咪講咗囉

無綫娛樂新聞台主播賴彥妤為選美常客，分別係2014中華才藝小姐香港區季軍、2016 Miss Diva亞軍，及2019年英國華裔小姐冠軍。賴彥妤更於2021年參選香港小姐，由於佢畢業於英國高雲地利大學法律系碩士，擁兩個碩士同深造文憑學位，故被封「英國學霸」；縱然28強止步，但都成功簽約TVB。日前，賴彥妤以直播形式外景採訪一個商場活動及訪問郭富城，不過期間唔知係咪無聽清楚郭富城講嘢，將問題問完又問，成為網民討論對象，更指佢無帶腦返工。

娛樂新聞台全程直播郭富城擔任嘉賓嘅活動，於等待郭富城做訪問期間，只見賴彥妤不停照鏡顧好個靚樣，仲同鏡頭擺鬼臉，感覺輕鬆；不過到正式訪問時卻錯漏百出。賴彥妤問到郭富城聖誕節有否計劃外遊，郭富城回答聖誕有一至兩日假期休息，又藉此推銷活動︰「今日出席呢個活動，裡面有好多獨角獸，好靚嘅聖誕樹，好靚嘅燈飾，加上可以籌款。作為Daddy，我會帶我啲小朋友同屋企人嚟呢度打卡，到時喺呢度見啦！」答完之後，賴彥妤竟然再問：「會唔會帶埋小朋友？」，郭富城直指：「我頭先咪講咗囉！我會呀。我啱啱咪講咗囉。」賴彥妤似乎唔識畀反應，郭富城就好禮貌咁再答多次表示會帶小朋友、屋企人、太太一齊嚟。

賴彥妤又問郭富城擔任TVB表演嘉賓嘅傳聞，郭富城回答「我係TVB出身，聽到消息話，今年台慶有當年我訓練班嘅老師出現，已經退咗休，我好希望見到佢哋。至於你話有咩表演，尊重TVB啦，等TVB公布啦！」但賴彥妤好似未係好Get到郭富城暗示自己會出席，繼續追問，郭富城則以「到時你咪知囉！」完場。

賴彥妤嘅表現被網民批評遊魂、無帶腦返工；而其實佢已經唔至一次訪問時出事，早於今年母親節採訪姜麗文時，竟問及對方如何與媽媽慶祝母親節。自細與爸爸秦沛、哥哥姜文杰生活、於單親家庭長大嘅姜麗文就大方回答會同爸爸慶祝，並解釋指：「因為有好幾年爸爸做單親爸爸，因為爸爸今年喺香港，所以會喺哥哥屋企煮餐飯畀佢食。」姜麗文嘅回應被網民大讚大方及EQ高，但賴彥妤就被轟無做功課。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！