賴慰玲囝囝1歲生日會契媽陳凱琳、Anjaylia 大住肚出席

東方新地 - 娛聞

更新日期： 2018年12月6日上午1:00

賴慰玲去年奉子成婚，唔經唔覺兒子Marat已經一歲！在昨日賴慰玲為Marat舉行一歲生日會，請來一班契媽、契爺同圈中好友，就連最近剛宣佈將成為爸爸媽媽的鄭嘉穎同陳凱琳都有份出席，非常俾面！

撰文：Kayla(原文刊於Sunday Kiss)｜編輯：東方新地｜圖片來源：賴慰玲Instagram、新傳媒圖片

陳凱琳陳嘉寶兩個大肚婆齊出席

陳凱琳（Grace）、陳嘉寶（Anjaylia）一向同賴慰玲感情要好，就算大住個肚都要出席契仔的生日會，睇返賴慰玲喺Instagram上分享的相片，Anajaylia著得非常密實，加上影相時係側住身企，所以睇唔出Anjaylia已經懷孕8、9個月。

而另一個大肚婆陳凱琳除咗同老公鄭嘉穎一齊出席，不過Grace兩公婆就冇一齊合照，似乎刻意分開影相，唔想搶咗壽星仔風頭！Grace親手炮製雞仔造型蛋糕送給Marat，原來雞仔係有意思，佢哋姊妹間有協議，就係當有人懷孕就要傳送雞仔圖案給大家示意，呢個雞仔就係佢哋之間的「密碼」。

鄭嘉穎同賴慰玲因為拍攝《殭》而成為咗好朋友，而鄭嘉穎同陳凱琳亦都因為同一套劇而定情，對佢哋3個嚟講真係非常有意義！

「星二代」同樂會

除咗以上幾位，藝人孫慧雪、楊潮凱都各自帶同囝囝囡囡一齊參加Marat生日會，賴慰玲留言話，希望依班「星二代」會好似爸爸媽媽咁，「一同成長，做個好朋友」。

賴慰玲囝囝被封新一代柔情星B

賴慰玲喺囝囝兩個月大嘅時間首次分享囝囝的正面照，嗰陣已經有唔少網民留言話：「好靚仔！」仲話囝囝雙眼皮好深好靚呀！佢分享囝囝萌照之餘，仲留言話：「仔呀仔，到底你真係識笑？定係面部肌肉練習呢？」原來呢一「笑」，搞到媽咪「心都溶埋」，真係好Sweet呀！

隨住Marat愈大，日日個樣都唔同，賴慰玲都忍唔住成為晒娃一族，同網民分享可愛囝囝的日常生活照。喺Marat百日宴，賴慰玲晒娃之餘，亦公佈囝囝中文名叫「梁進也」

久而久之，Marat間唔時都會喺Winki社交網站出現！

囝囝仲好鍾意笑㖭！

到Marat識轉身，賴慰玲又有另一番體會。

到Marat六個月大生日會，一班契媽都嚟同佢慶祝！

自從六個月之後，小Marat就開始展現佢柔情的一面啦！網民都紛紛留言話：「佢個樣好似好乖咁呀！」

好多人都話BB似媽媽，大家又覺得呢？

Winki陀著七個月大肚和舞台劇演員丈夫梁子峰簽紙結婚。 — 賴慰玲陀著七個月大肚和舞台劇演員丈夫梁子峰簽紙結婚。

鄭嘉穎陳凱琳8月峇里大婚

今年8月，鄭嘉穎在峇里迎娶陳凱琳，於Bvlgari Resort Bali舉行盛大婚禮，當時已有傳二人是雙喜臨門，但依照中國傳統，未夠三個月怕BB小器，正常冇人會公告天下，而當時鄭嘉穎與陳凱琳亦矢口否認有喜。

陳凱琳鄭嘉穎公布喜訊

由於時間的關係，事隔三個月的11月22日晚上10時許，呢對新婚夫婦在IG上載溫馨擁抱合照，表示喺感恩節呢個大日子，宣布家庭將會有一位新成員，陳凱琳成功陀B！難怪近月鄭嘉穎每次出活動見人都由心笑出來，原來即將做人父難掩喜悅。

陳凱琳：「我都想生孖胎！」

婚後陳凱琳出席活動接受訪問：「我都想生孖胎，我有龍鳳胎基因，可能生孖胎或一男一女，我屋企仲有個家姐，我同細佬係龍鳳胎，三個好熱鬧，可以玩，不過我又聽過係隔代遺傳。」咁想生幾多個小朋友？陳凱琳坦言：「三個，因為我自己都係三個(家中三姊弟)，感覺好似個完整家庭咁，坐架五人車啱啱好。」

鄭嘉穎變緊張大師

為照顧陳凱琳，鄭嘉穎有備而戰，早已向身邊好友取經，深入了解孕婦在懷孕期間所遇到的種種問題，據知情者透露：「嘉穎變咗緊張大師，Grace(陳凱琳)有咗仲不停出活動，佢就日哦夜哦叫佢小心，又驚佢做嘢會好攰。見到佢次次都著四吋高踭鞋，嘉穎不知幾擔心，所以除咗之前接落嘅 job，佢已經禁止佢未來幾個月再接job，希望Grace可以留喺屋企養胎。」

雙方媽咪幫手照顧

據知嘉穎又對陳凱琳表示，如果頂唔順要出街都一定要有朋友陪，唔畀佢一個人周圍逛，日常方面佢又吩咐雙方媽咪幫手照顧，令Grace食得好有湯水飲。不過Grace唔鍾意成日留喺屋企，所以唔辛苦同唔長時間嘅job，佢都仲好想接。

望抱孫已久的鄭母，知道新抱懷孕後當然好緊張，不時煲有益湯水及煮花膠，讓陳凱琳谷胎。

陳凱琳父親連日出街都蓮子蓉，雖然未肯透露是孫仔定孫女，不過他表現興奮，即將做外公心情靚爆。

陳凱琳陀B狂出活動

婚後的陳凱琳幾乎絕跡無綫的活動，連台慶夜都未有現身，不過就出席不少商場活動及時裝品牌的活動。過去三個月，她每次出現都悉心打扮，纖薄身形的她刻意選擇遮掩到微隆凸肚的衣服，甚至腳踏四吋高踭鞋，所以從來無人發現她已經懷胎幾個月。

愛靚的陳凱琳近月出活動都穿最少四吋高的高踭鞋，真係好搏命。早前她的在活動上曾經摸過陀B的單文柔肚皮，聲稱要沾旺氣，但原來當時她已經懷孕。

今年9月，鄭嘉穎陪實已大肚的陳凱琳去意大利參加時裝展，二人除了穿夫妻裝示人外，陳凱琳更穿上紅色的性感內衣出席內衣騷。

27歲的陳凱琳成功密冚大肚多個月，近月每次現身都腳踏四吋高踭鞋，絕無洩漏半點蛛絲馬跡。即將榮升人父的鄭嘉穎表現緊張，除工作出活動外，要陳凱琳十級戒備，盡量避免獨自去街，起居飲食亦非常小心。陀住鄭家金叵羅的陳凱琳，由公主變女王，日前陀住巨肚現身銅鑼灣鬧市，破禁出關睇戲解悶，散場後即急急腳返家，果然聽老公話！

得天獨厚的陳凱琳食極唔肥，上月陀四個月都照樣出席公開活動，即使把恤攝入長褲內，都冇肚凸凸，仲著住鬆糕鞋，絕對係一步一驚心。

巨肚陳凱琳破禁出關

日前本刊拍得陳凱琳獨自現身銅鑼灣鬧市，先去shopping再去買熱飲，收埋大肚幾個月的她，這日穿上一件鬆身恤衫，凸起的肚皮終於避無可避表露無遺。記者目測其巨肚最少已有五個月，但四肢仍十分纖瘦。拎住杯熱飲邊行邊飲的她，最後走到戲院買定飛，再會合女友人入場。

日前陳凱琳現身銅鑼灣鬧市，相約女友人去睇戲，她一早買定飛等入場，現場所見，四肢仍非常纖瘦的陳凱琳，這日穿上鬆身長恤衫，巨肚現晒形，目測已有五、六個月身孕。

背面睇勁Slim

睇戲前陳凱琳走到附近的咖啡店買了一杯熱飲，從其背後睇仲咁slim，完全唔似大肚婆。

友人傍實回家

陳凱琳睇完戲散場後即搭的士返回北角寓所，看來她亦緊從老公鄭嘉穎吩咐，盡量不要周圍去，去睇戲都要有人陪，在女友人護送下最後安全返家。

知道老公嘉穎非常緊張，陳凱琳亦唔敢一個人去街，同女友人睇完戲亦乖乖搭的士返位於北角的屋企，二人在寓所樓下仲傾咗一陣先上樓。

收肚高手

肚皮一日比一日大，陳凱琳早前出席香水品牌活動時，身穿一件露肩白色大花造型連身褲，繼續把上半身隆起的腹部完全遮蓋。但她仍然穿上四吋高踭鞋赴會，表示心情興奮又緊張，並自爆懷孕後情緒好波動需要減壓，就連睇卡通片有感動位都會喊。

早前陳凱琳自公開喜訊後首次曝光，胸前一大朵白花，繼續用掩眼法收肚，不過到達時側側身一樣睇到肚凸，下圍亦明顯豐滿咗。

黃智賢爆料

陳凱琳被傳媒追問時，唔肯講陀B幾多個月，對BB性別都話要保持神秘不能透露。但早前鄭嘉穎好友黃智賢已爆料，話鄭嘉穎在陳凱琳照超聲波時大嗌：「好大條呀！」故外界揣測是小王子的機會較高。

準人父興奮到爆

鄭嘉穎早前係新片宣傳，分享喜悅時開心到同大家講定恭喜發財，他說：「心情開心過攞獎同中六合彩，難以形容，好喜悅非筆墨能形容，太太叫我唔好講咁多關於BB嘅嘢，佢比較緊張，大家問番佢，依家全家上下都緊張到不得了。」又表示第一次從超聲波睇到BB個樣，是一個難忘經歷：「你問我太太啦！佢叫我唔好講咁多，話驚我講錯嘢，只可以講BB屬豬，其他交畀佢講。」50歲前做爸爸的願望順利達成，鄭嘉穎下一個目標應該是陳凱琳希望生三個先夠數的生育計劃。