【購物】聖誕shopping 「地雷」温提

又到聖誕，又到咗普天同慶商戶mark up扮減價齊齊「cap水」嘅時候。行出街見到一個二個拎住幾個名牌紙袋彈吓彈吓咁行的確好容易誤會「買嘢 = 開心」繼而誤墮消費陷阱。想買得精明除咗要睇我地o既「聖誕shopping Dos備忘」之外，你仲要謹記避開以下地雷。

同男 / 女友一齊行街
有啲男朋友會行行吓街唔覺意買咗粒9.75卡彩藍鑽順便用女友個名命名，但，你唔係。你買嘢要自己找數之餘，仲會比對方覺得你大駛，雙重損失囉。你知啦，對大部份男人嚟講所有裙同高踭鞋個款都一樣㗎！等於對所有女人嚟講高級音響無論減價減到幾平都係貴囉！ 所以無謂傷感情，我哋分開……行街啦。

買冬天衫
我知，聖誕減價啲厚褸羽絨真係減到好平，但你知唔知點解減到咁平呀？ 唔通個sales想同你做朋友咩？冬天都過咗一半，啲款到出年又out晒，你著多兩個月掉又唔捨得放又無人要，hea響衣櫃篤眼篤鼻。除非你凍到唔夠衫著準備入住避寒中心，如果唔係請你買冬裝前三思再三思。

潛意識分期
「對鞋咁靚個款又襟興，我著足5年除番開每日都係幾十蚊之嘛…」「部咖啡機係貴但可以用好耐噃，我慳番每日去買杯Grande三個月都賺番有突啦…」夠喇，如果你本身唔需要呢樣嘢，就算佢幾平你都係唔需要。無謂再為自己生活再加多一項liability，佢幫你唔到之餘你仲要照顧返佢。真係覺得每個月幾百蚊濕濕碎嘅話，不如資助宣明會或者奧比斯啦，聖誕嘅意義係 Share the Joy to the world而唔係為自己Shopping嘛。

圖片來源：
flickr: https://www.flickr.com/photos/aliasgrace/72463973