《踩過界II》演兼職女友話題性十足 高材生鄧卓殷加入娛圈棄做建築師

擁有甜美笑容嘅2018年港姐亞軍兼最上鏡小姐嘅鄧卓殷（Amber）, 入行兩年都係拍下啲綜藝節目，直至近日佢終於有劇集出街啦！佢第一次拍劇已經係拍重頭劇集《踩過界II》，雖然戲份唔多，但話題性十足。鄧卓殷飾演兼職女友陳詩涵，被實習醫生柯宇霖（丁子朗飾）將佢攬住名牌手袋嘅相放上網上討論區，更話佢係貪錢臭雞，陳詩涵即時被大量網民攻擊起底，於是跳樓自殺，經搶救後仍然昏迷。

雖然今次係Amber第一次拍劇，但網民就大讚佢做得唔錯及專業，紛紛留言：「wow 叻叻」丶「演得不錯，繼續加油」「great work, keep it up, Amber」、「跌落黎嗰下真係嚇親，不過的確係演得好好」及「加油，努力，就得一分鐘只要盡力去做觀眾一定會知同留意到。專業就是咁呀！」等等，就連男友郭子豪都留言：「Proud of u :)」

Amber值得自豪嘅又點止演技呢？佢喺讀書方面都好勁，佢喺中學文憑試考獲4科「5**」，之後入讀香港大學建築系，畢業後佢選擇選跳出舒適圈，參選港姐加入娛樂圈。不過佢冇放棄建築呢條路，佢而家仲收讀緊建築系碩士，將於明年畢業。唔知佢畢業後會選擇做建築師，定係會留喺娛樂圈呢？