輕鬆面對「薑蓉」惡搞 姜濤代粉絲道歉:開心有人識

·2 分鐘文章
輕鬆面對「薑蓉」惡搞 姜濤代粉絲道歉:開心有人識
輕鬆面對「薑蓉」惡搞 姜濤代粉絲道歉:開心有人識

TVB日前宣傳綜藝節目舉行記者會,當中藝人鄧智堅扮演「薑蓉」,Bob(林盛斌)、麥美恩和馮盈盈等主持配合大搞氣氛,場面搞笑,但卻惹來姜濤粉絲不滿,連日來網上狂轟,今日Bob就在自己社交平台向姜濤和支持的粉絲公開道歉:「如果我嘅行為和言論,令到任何人唔開心,我衷心同各位講聲唔好意思,對唔住。我為我一時衝口而出嘅不當說話,令人有唔好嘅感受,感到十分抱歉,我亦會好好檢討我日後嘅言行。」

今日姜濤出席演唱會記招時,回應被惡搞一事,他說:「藝人都係為觀眾開心,希望用輕鬆心態去睇,我無任何感覺唔尊重,開心有人認識我,係有部分Fans比較激動。」對於Bob出Post向他道歉,他多次話唔使,沒有不開心,隊友亦笑稱私下經常模仿姜濤,反叫姜濤道歉,姜濤隨即代Fans道歉。

監製花姐表示有跟姜濤一齊睇過有關片段,大家都笑得好開心,但發展到道歉就唔使,她說:「知道Bob一向好錫後輩,見到Bob會同佢講番聲唔使道歉。」反而覺得現在同TVB好多互動,對娛樂市場是好事,花姐自己都係《勁歌》出身,做過PA和導演9年:「我哋成日講笑,希望將來MIRROR有日可以上《勁歌》做觀眾。」

組合MIRROR將於5月6、7、8日舉行三場演唱會,門票已售罄,今日宣布加開5月9及10日2場。各人表示開騷前準備增肌減脂,姜濤被隊友要求要減到見腮骨,騷肌就交Stanley、Alton和Jeremy。