辣㷫杜汶澤訪問出街 明窒商台主持

上個月一向敢言嘅杜汶澤為咗宣傳新戲《空手道》而上咗商台節目《一圈圈》做訪問，其後佢就喺Facebook嬲爆留言，透露佢對訪問內容嘅不滿。

過咗兩日佢就直接喺Facebook寫千字文開名指節目主持人梁泰來（Terry）原來當日仲暗寸佢：「正如噚日商台個監製Terry 一開始個錄音訪問嘅時候成條太監咁陰陰嘴笑住話：『等咗呢個訪問你嘅機會好耐，你知你幾少戲拍㗎啦！』你條契弟講得啱！既然我咁難得有戲上，希望大家多多支持！」咁唔怪得佢咁㷫啦！

當時事情搞到咁大，好多花生友都非常關心，究竟節目會唔會出街呢？

節目終於喺噚日播出，Terry喺節目當中就問杜汶澤，究竟之前係咪有得罪劉德華、吳君如、杜琪峰嘅時候，杜汶澤即刻面色一沉，之後話「嘩，你好懷舊㗎喎你，我發覺你好鍾意問埋啲上一代嘅嘢喎….我唔想答你喎呢啲嘢喎！」。

其後Terry再問「咁而家你同君如關係點呢？」阿澤就答「我做咩要講畀你知啫？我同佢嘅關係點解要話你知啫？做咩講畀你知？我一定要講架咩？你當呢度係差館呀？」。搞到主持即刻將問題轉去問佢點面對事業下滑，阿澤就答「有咩點面對啫？咪就係面對囉」。答完，主持O晒嘴。

做主持唔驚你講錯嘢，而係你兩句答完。之後，佢哋就唯有繼續講返阿澤套新戲。