追光吧2｜張衞健再扮孫悟空毫無違和感 被網民指反口食言：真係攞命 為左人民幣

《西遊記》多次被拍攝成劇集及電影，不過喺好多人心目中孫悟空只有一個，就係張衞健（Dicky）！當年張衛健憑無綫劇集《西遊記》飾演齊天大聖孫悟空爆紅，絕對係香港人嘅集體回憶。喺內地綜藝節目《追光吧！》最新一集中，張衛健竟然以孫悟空造型亮相，與韓宇跳唱《齊天大聖孫悟空》主題曲《高高在下》 ，除咗成功炒熱現場氣氛之外，唔少人大讚56歲嘅張衛健風采依然及毫無違和感。

喺《追光吧！》最新一集中，張衛健穿上孫悟空造型，並講出《西遊記》經典對白，之後佢便除下頭套，與韓宇唱跳《齊天大聖孫悟空》主題曲《高高在下》。其後，佢喺微博上載片段並留言話：「再次戴上孫悟空的頭套，和@韓宇531 一起表演《高高在下》，有挑戰也有收獲。我跳的很盡興，希望大家都可以延續悟空精神，更希望所有人和我一樣，不會被任何事限制我們的「活力」。」唔少內地網民紛紛留言大讚佢表現得好好，同埋回憶返晒嚟，例如「好聽好看，故事性還很強，永遠的大聖爺」、「我的童年啊！型到跌渣！」、「還是那麼帥 一點沒變 最帥的孫悟空最帥的張衛健」及「太犯規了！滿滿回憶！」等等。

張衛健曾經喺內地真人騷《我是演說家》上剖白，指當年曾經有一名香港製作人搵佢拍電影，喺開價後就被對方羞辱：「記住！如果你臉上沒有毛，你是不值錢的！」，仲話佢唔好以為演完孫悟空喺香港就好紅，其實喺內地係冇知名度。之後張衛健決心出外闖闖，要證明自己「冇毛」都係好有價值，所以佢就選擇一直剃光頭，同表示唔再扮演孫悟空。不過佢喺《追光吧！》再一次扮演孫悟空，結果引起唔少香港網民話佢反口，例如「又話唔扮馬騮」、「人民幣咁香 講下咪當成生菜囉」、「當年唔係俾人串佢唔扮馬騮唔會紅跟住先剃頭咩 而家又扮翻馬騮啦」、「真係攞命 為左人民幣」、「又話唔扮！」及「真•馬騮戲」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！