連鎖米線食肆搞虛擬時裝騷 馬詩慧／沈殷怡／劉沛蘅／譚仔姐姐做模特兒好驚喜

連鎖米線食肆譚仔一向諗頭多多，突破大家對食肆嘅想像，發揮創意帶嚟無限驚喜，好似佢哋為慶祝25周年，與香港知專設計學院（HKDI）合作，邀請多位該校修讀時裝及形象設計及傳意設計學系嘅學生參加「譚仔姐姐2046未來制服設計比賽」，為姐姐們設計未來版制服，而呢場虛擬時裝騷已經於今日（28日）舉行。

學生們設計咗多套未來制服俾一班姐姐，作品融入咗旗袍、譚仔話、素食及霓虹燈等元素，並搵嚟名模馬詩慧（Janet）、Jessica C.、沈殷怡（Shirley）、劉沛蘅（Hillary）、《阿女又戀嚟》媚姨及多位真嘅譚仔姐姐做模特兒，為設計作品行catwalk。

而經過專業評審商議後，喺設計比賽中勝出嘅組別，將會為譚仔設計2021年全新制服及獲得獎學金，而表現優異嘅學生亦會獲得廣告公司嘅實習機會。

唔少網民睇完虛擬時裝騷後，留言大讚做得好，例如「又上市，marketing又做得咁好，叫其他米線鋪點夠你玩！」、「咁有創意得唔得ga」、「希望下次去譚仔見到有姐姐著到咁」、「主席好正，笑死我」、「賣米線都可以諗到搞fashion show, 真心勁!」、「咩料啊？笑死冇命賠，譚仔老闆識玩」及「睇得出di班學生用左好多心思design」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！