連鎖米線食肆食住個勢搞「10小辣譚仔姐姐選舉」 網民嗌期待：好睇過香港小姐

ViuTV另類選美真人騷節目《最後一屆口罩小姐選舉》現正播映得如火如荼，佳麗們喺節目全程戴住口罩，令到觀眾同網民都非常好奇佢哋嘅真面目。著名連鎖米線食肆就食住個勢搞咗個「10小辣譚仔姐姐選舉」，唔少網民見到都大讚跟得好貼同好期待。

喺噚日，有關米線專門店嘅社交網站公佈最後5強名單，並留言話：「5位被選中嘅口罩伊伊，已經積極備戰，研究美肌方法，將會進行終極表演環節！大家覺得邊一位可以摘下后冠寶座？」講到明係口罩小姐，所以姐姐們嘅相片都係戴上口罩。除此之外，姐姐們同樣都有一個好搞笑嘅代號，佢哋分別就係苦壺員、伊伊、實小勒、清湯同埋Jessica，呢個PO仲有介紹埋佢哋嘅芳名、年資、出没分店、姐姐話熟練度、食開幾辣同埋美肌秘密。唔少網民見到後都紛紛留言，例如「極度建議搵Viutv 三哥193合作，一定瘋狂食三哥」、「好睇過香港小姐」、「會有咩表演㗎，想睇」、「惡搞ViuTV 跟得好貼」、「唔講咁多，邊個口音最唔正嘅，我就投邊個。」及「小朋友先做選擇 我全都要」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！