【週末本地遊】狗狗同樂遊！西貢半天遊享海景Brunch 掃寵物用品！

香港有唔少人有養動物，不過香港太細，可以同寵物一齊做嘅活動唔算多，其中西貢當然係其中一個好地方可以帶埋狗狗一齊去玩。今個週末西貢就有動物領養嘉年華兼寵物用品展，有狗狗嘅朋友一齊去玩下；無狗嘅朋友更加要去睇下碰唔碰到心頭好帶返屋企。今日就為大家推介一個半天遊行程，保證人同狗狗一樣玩得盡興！

週末限定海景Brunch醫肚
一入到西貢當然先醫肚！近年西貢開咗好多沿海餐廳，唔再係食海鮮咁「老餅」，大把有氣氛又有情調嘅可以選擇。呢間名為Padstow Restaurant & Bar就坐落白沙灣遊艇會碼頭側邊，為一棟3層高獨立屋！沿海景觀非常開揚，地下全層都無窗，半開放式設計令客人直接感受到海浪聲、海風，當然歡迎狗狗入內啦！逢週末先有嘅限定Brunch Menu，包括全日早餐、水波蛋、牛肉餅等，供應時間為11:30AM至3PM，就算瞓晏少少入去都唔驚食唔切啦！

Padstow Restaurant & Bar
地址：西貢白沙灣112號
電話：2335 5515
營業時間：11AM至11PM（星期五、六11AM至12MN）

領養動物嘉年華
食飽飽之後可以出發去領養嘉年華！由慈善機構「愛領養動物中心」於西貢萬宜灣村文娛中心舉辦，現場會有多隻待領養嘅小狗小貓，同時會有20多個攤檔售賣寵物食品及日用品，亦有大量寵物美容用品及檔主DIY嘅手工藝寵物用品。除此之外，仲有多個工作坊，包括狗狗訓練班、動物精油製作班、人狗運動班等，由多位合資格導師負責教導。所以無論係想領養寵物又或者想買嘢畀主子，一樣可以去呢！

愛領養動物嘉年華
地點：西貢萬宜灣村文娛康樂中心
日期：9月26至27日
時間：12nn至6pm

狗狗專用 消暑狗泳池重新開放
趁太陽未落山，去完領養嘉年華再搵活動！「西貢得生綠洲」就有狗狗專用游泳池，池水仲保證不含對狗隻毛髮有害嘅化學物質，可以放心落水！早前由於疫情關係，泳池自7月起一直關閉，直至9月21日先正式重開，每隻狗狗可以由兩位主人一齊陪同，不過主人只可以於池邊睇住不可落水；但請放心，每隻狗狗都有職員陪同照顧。除咗泳池，場地仲有大片草場讓狗狗放電玩樂，同時亦有各種寵物美容服務呢！

西貢得生綠洲
地址：西貢美源街DD221
收費：泳池收費每隻$80起，視乎重量大小而定
開放時間：11AM至5PM（星期日2PM至5:30PM）

嘆泰菜賞海灘夜景
游完水天已黑，係時候食個晚餐完美結束一天！沿著碼頭一直從海邊走就會去到大網仔路沙下村，此處已經改建成一個餐廳雲集嘅沿海小社區，而且全部餐廳都係對住大海，眼前就係海灘；雖然唔係正式泳灘，唔可以游水，不過就可以帶埋狗狗於沙灘上玩樂！推介呢間「泰道」，有唔少正宗泰式美食，而且有室內、室外位置可以揀，怕熱怕蚊就不妨坐室內（不過狗狗不可進室內），好多食客食到一半就落沙灘散下步，吹下海風然後再食過，此處已經離開西貢市中心，所以唔會好似碼頭一帶咁人山人海，更覺寧靜舒適！

泰道
地址：西貢大網仔路沙下村9號地舖
營業時間：12NN至11PM（星期六、日11AM至11PM）
電話：2792 6189