【遊車河】靜雞雞share番 呢個沙灘無乜人去㗎！

「空無一人，這片沙灘……」你就想！喺香港要搵個空無一人嘅沙灘？講咁易咩！就算有，啲水質同環境都唔一定靚，因為多數係非政府轄下泳灘，即係冇康文署管理，環境差啲有乜咁出奇。

又到咗年尾要清假嘅日子，今日揸住架車周圍兜，竟然俾我搵到個無人嘅隱世沙灘，而且水清沙都算幼，雖然呢排天氣已經轉「涼」，但留意其實只係「涼」而未叫得做「凍」，你副偈夠壯健嘅話，仍然可以落水嘅；不過就算唔濕身，帶埋隻狗去沙灘放電，都係好正嘅事情。吓？沙灘俾狗入㗎咩？都話非康民署管理咯，自己諗下啦。

一講沙灘，我哋多數會諗港島南區、西貢之類地方，比較少聯想到香港西面水域。明嘅，以前起機場起大橋的確搞到幾呢hea，又曾經出過油污事故，搞到啲人怕咗呢邊啲水，不過近年都已經改善咗好多，沿住青山公路嘅海灘，仍如更生灣、麗都灣、青龍灣，漸漸都開始多番人嚟玩，不過始終係政府泳灘，你帶住隻狗想去濕吓腳咋，啲救生員已經衝出嚟趕你走……

呢度應該冇正式名稱，姑且叫佢做青龍沙灘吧。

好，開估，究竟呢個所謂隱世沙灘喺邊？屯門黃金海岸相信你聽過啦，黃金海岸隔離有個蟠龍半島你都應該都略有所聞啩，蟠龍半島附近原來有個青龍花園，對出就係一個規模唔算大，但確實係「空無一人，這片沙灘」，呢度甚至連地圖都冇正式名稱，亦冇工共交通工具去到，最好就係揸車去。

附近有公廁，車就泊路邊。

花園入面有人放咗幾嚿石方便人去沙灘。

其實花園外有另一個入口去沙灘的。

如果由荃灣入去，沿住俗稱「下路」嘅青山公路向屯門方向走，過晒豪景花園同海員學校，去到大欖差不多到掃管笏咁上下，見到「龍珠島」個路口就轉左入青龍路，再喺第一個路口轉左入愉翠街，去到尾就係青龍花園。如果你帶住狗狗，按規定其實係唔可以進入青龍花園範圍嘅（雖然呢度真係好偏遠，多數都唔會有人干涉你），唔驚喎，花園入口旁邊另外有條小徑，沿住小徑行就可以去到沙灘。

沙灘全長唔夠200米，都幾乾淨。

空無一人但有間破舊石屋。

有毛孩腳印，而且唔只一隻。

有少量貝殼，要小心。

呢個小沙灘其實全長都唔知有冇200米，兩邊都係小屋住宅，當年發展呢區嘅時候竟然冇鏟走埋個沙灘，都真係皇恩浩蕩。沙灘對出係汪洋大海，遠望可以見到赤鱲角機場，今次去嘅時候係上午，但相信日落會幾好風景，上網睇原來水退仲會見好多礁石，同我哋去開人工化嘅泳灘有明顯分別。

水質唔錯，海冇垃圾。

遠岸地方仲見到人釣魚。

揸車去可以揀行下路，風景靚又少啲車。

放狗要小心嘅係沙灘有冇垃圾、貝殼同玻璃碎，驚鎅傷狗狗手腳，眼見呢度都算企理，垃圾就唔多，只係有少量貝殼，基本上合格，可以放心俾狗狗玩。雖然冇乜人，但大家記得要自律啲，唔好留低狗屎垃圾。喂！介紹咗個靚位俾你唔好同我搞衰佢呀吓，唔係大家又冇咗個好地方去。最後想講泊車問題，青龍花園係冇official車位的，都係泊路邊同附近避車處，由於附近有屋苑入口，所以泊車要小心唔好阻人出入，不過呢度咁僻，段估都唔會泊滿車嘅，總之大家執生啦。