避開恐襲 十大安全旅遊目的地

近年歐洲蒙受恐襲威脅，雖然話香港人有得去旅行就咩都唔驚，但都好應該聽下人地講，避開危險地帶。好似英國旅遊仲介協會ABTA，根據英國外交和聯邦事務部(FCO)嘅資訊，選出十個安全旅遊地方，佢地吸引程度，絕對不下於西歐任何國家，Plan下次行程嘅時候，參考下啦！

01. 冰島
因為有著冰川、瀑布、火山、潟湖等自然景觀，近年深受遊客歡迎嘅冰島，先後被評為低恐怖主義威脅嘅國家。不過，遊客要多啲留當地嘅天氣狀況，因為變化比較大。
相片來源︰icelandicphoto @tumblr

02. 列支敦士登
大台嘅《世界零距離》曾經介紹，位於瑞士和奧地利之間，擁有美麗的滑雪勝地、風景、建築，係一個幾有趣嘅小國。恐襲應該唔會有，反而冬季就有雪崩嘅危機。
相片來源︰yourlovelytrip2015 @tumblr

03. 馬耳他
郵輪常到目的地，位於意大利西西里以南，是地中海樞紐嘅小國，FCO話，雖然當地搶劫、搶手袋、偷車等都有可能發生，但恐襲威脅就好低，咁即係安唔安全呢？
相片來源︰kataontheroad @tumblr

04. 波蘭
是北面瀕臨波羅的海的中歐國家，雖然街頭犯罪、搶劫都會出現，但都係屬於安全嘅國家，而且曾主席同長毛啱啱去完，冇嘢呀！
相片來源︰scavengedluxury @tumblr

05. 斯洛文尼亞
極具歐洲特色嘅斯洛文尼亞，曾幾度受過恐怖主義嘅威脅，但宜家都好安全。公路同鐵路嘅過境點，暫時由奧地利同匈牙利負責，而出入境就由克羅地亞負責，所有遊客入境後，三日內要去警局報到，以確保安全，被FCO評定為安全嘅地方。
相片來源︰traveltoslovenia @tumblr

06. 巴哈馬
風景如畫嘅群島，絕對係潛水同沙灘愛好者嘅天堂，恐怖份子都唔捨得襲擊。不過，六至十一月就屬於颱風季節，要多留意天氣預報。
相片來源︰mysleepykisser-with-feelings-hid @tumblr

07. 哥斯達黎加
熱帶雨林嘅島國，多樣性嘅動物同水上活動，仲有一連綿嘅加勒比海岸線，早幾年Sony更喺到豪灑八百萬瓣花瓣拍當時最新4K電視廣告，有如仙境一樣。不過呢到冇咩恐怖主義威脅，但就有寨卡病毒嘅出現，大家都要小心。
相片來源︰latinoking @tumblr

08. 斐濟
近年馬爾代夫被內地人攻陷，唔少港人都轉戰這裡，斐濟由330個島嶼組成，被譽為「全球十大蜜月度假地之一」。不過，又仲要提醒，洪水同熱帶氣旋經常破壞斐濟，而且近月出現埋寨卡病毒。
相片來源︰cbssurfer @tumblr

09. 塞舌爾
作為威廉王子及老婆凱蒂度蜜月的熱愛島，塞舌爾最近在世界經濟論壇的旅遊競爭力報告中更打低毛里求斯，成為非洲地區No.1旅遊勝地！位於馬達加斯加東北面海域的塞舌爾是一個由115個島組成的島國，係正印度洋國家之中，恐怖威脅較少嘅國家。
相片來源︰luxuryaccommodations @tumblr

10. 日本
呢個唔洗點介紹啦，一向都深受旅客歡迎嘅日本，仲有黎緊2020年嘅奧運，當然地震威脅一直都有，建議去較少地震影響嘅地區，好似東京、大阪等大城市。
相片來源︰ourbedtimedreams @tumblr

睇完十個由ABTA同FCO建議嘅地方，恐怖威脅的確低，但又有唔同嘅威脅存在，世上又真係冇百分百嘅，出發前多做功課，旅程自己萬事小心，其實，好多地方都值得去。