【邊位最養眼？】《萬千星輝賀台慶》女星衣著逐個睇

《萬千星輝頒獎典禮2019》噚晚喺將軍澳電視城隆重舉行，除咗關心獎項花落誰家之外，大家最想睇嘅一定係女藝人嘅衣着打扮啦！一眾女藝人梗係冇令大家失望，佢哋嘅衣著都好有睇頭。以下咁多位盛裝打扮嘅女星，你哋又覺得邊位最養眼呢？

俘虜一眾港男嘅張曦雯，以一條超低胸黑色長裙，又騷胸又露腰，性感程度爆晒燈。

同樣係性感女神嘅高海寧，一條簡單白色低胸緊身長裙，上上下下都好性感。

奪得「最受歡迎電視女角色」嘅李施嬅，噚晚嘅晚裝就相對著得穩陣，著住白色長裙上身帶有黑色花紋，低調保守。

唐詩詠以一身白色低胸晚裝出席，deep V低到肚臍，胸前又有塊輕紗作遮掩，若隱若現。

李佳芯上身黑色西裝款式，下身透視網紗裙，露出長腿美態盡現。

朱晨麗以白色蕾絲貼身長裙示人，手袖用網紗縫製，不過下身就略嫌大隻。

勇奪「最佳女配角」嘅趙希洛，以鑲滿珍珠嘅鏤空白色晚裝示人，性感得嚟又不失貴氣。

馮盈盈以往幾年都好有話題性兼最性感，但今年一反常態，以白色透視長裙，低調性感同時又不失氣質！

「靚湯」湯洛雯以一身白色長袖裙現身，本來以為好密實，點知一轉身原來係大露背！

陳煒以白色晚裝出席，前面大騷事業線，後面就係大露背！

王君馨以超deep V 黑色露腿裙上陣，十分高貴。

黃翠如對比其他女星明顯著得低調，白色蕾絲長裙，露出小蠻腰。