郭富城演唱會破格髮型服飾震撼眼球 網民：成碗公仔麵倒咗上個頭到

「舞台王者」郭富城（Aaron）踏入紅館舞台30年，噚晚（13日）喺紅館展開一連13場嘅《郭富城ICONIC世界巡迴演唱會2024-香港站》。闊別紅館8年嘅佢今次演唱會以半億打造立體多元舞台，以三面台設計加上巨型LED螢幕，由舞蹈到選歌成功滿足在場粉絲。

噚晚郭富城喺紅館舉行頭場演唱會，佢喺8點45分以金色捲毛假髮配上黑色閃閃西裝華麗登場，並唱出主題舞曲 《EXIT》為演唱會展開序幕。之後佢為演唱會換上多個髮型及多套服裝，形象百變得嚟又破格。佢除咗唱出《愛的呼喚》、《無忌》及《一變傾城》等多首經典代表作之外，同時亦有唱非主打歌曲，歌單設計新鮮感十足，獲得粉絲大讚，例如「成個list都係真fans鍾意」、「好好睇，有幾首歌終於等到佢唱！以前無聽過佢唱！」、「有一首國語，佢自己作果首脈搏，其他全部廣東歌，仲要非主打，快歌都係非主打。令我地啲城迷好驚喜。終於唔洗再聽狂野之城 對你愛不完」、「歌list就大部分都成日唱 反而有啲舞係新排 算有誠意」及「歌單對忠粉黎講真係收哂貨，快歌都用埋非主打，真係新鮮」等等。

雖然歌單設計獲讚，但郭富城噚晚嘅破格髮型及服裝就震撼唔少粉絲及網民嘅眼球，仲一度懷疑佢係唔係得罪咗造型師及髮型師，留言話「但今次啲造型…同髮型」、「髮型出事 以前光頭都好睇過今次」、「個頭搞乜？被人惡搞」、「得罪造型師」、「個頭咩事」、「個頭唔識欣賞」、「整返以前個冬菇頭仲好，集體回憶嚟。」、「個髮型咁似公仔麵既」、「成碗公仔麵倒咗上個頭到，咁大整估（蠱）呀，搞乜X呀」、「整晚髮型好失敗，破壞形象」及「阿王係咪得罪張叔平同髮型師呀？完全炒晒車」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！