鄧炳強上《瘋 Show 快活人》 稱為 23 條立法忙無暇運動體重創新高 曾睇《寒戰》幻想做保安局局長｜Yahoo

【Yahoo 新聞報道】保安局局長鄧炳強不時到電台接受訪問，多以時事節目為主，今早（22日）首次接受港台消閒節目《瘋 Show 快活人》訪問。鄧炳強話「通常嚟親（電台）都係時事節目」，所以今次好興奮。主持人梁繼璋、李麗蕊、馬小強不停問局長平時生活習慣同嗜好，鄧炳強滔滔不絕分享，包括講起今年新買嘅狗仔 Lulu ，另外仲透露今年年初立法（政府就《基本法》第 23 條立法）好忙碌，令到佢無時間跑步，而家體重創「歷史高位」！

稱今年購比熊犬

鄧炳強今年 3 月喺 facebook 分享屋企新成員 Lulu，自此成為愛犬之人，經常喺社交媒體分享 Lulu 靚相。佢喺《瘋 Show 快活人》透露，因為上年女兒結婚，「同夫人要搵啲嘢嚟照顧吓」，話 Lulu 呢隻迷你版比熊「好得意」，「好似細路仔」，每次返到屋企佢都會即刻跑過來轉圈，感受到好開心。鄧炳強仲話，遇到 Lulu 呢個故事係「傳奇」，本來佢同太太喺寵物店見到 Lulu 覺得好得意，但係已被另一位顧客買咗。之後佢同太太去其他地方睇過都搵唔啱，於是再去返本身間寵物店，點知竟然遇返 Lulu！店員透露原來前主人接 Lulu 返屋企唔習慣，所以送返寵物店，鄧炳強同太太於是即刻將 Lulu 帶返屋企，「緣分就係咁嚟喇」。

主持人仲問局長平時飲食喜好，鄧炳強話佢鍾意食「香口嘢」，尤其是東南亞菜、茶餐廳。佢仲大爆而家體重屬於「歷史高位」，因為年初立法時期比較忙碌，佢以往晚晚跑步，但當時忙到無時間跑機，佢話：「為咗繼續食嘢，都係要重拾跑步！」主持人亦都好關心佢聲音沙啞問題，局長就話呢個問題都好多年，講嘢多而且睡眠不足就會聲沙，要去到周末先有機會瞓到 6 個鐘。

幻想似劉德華做保安局局長

鄧炳強大學畢業之後投考警察，一路晉升至警務處處長，之後再加入政府成為保安局局長。鄧炳強喺節目分享自己鍾意睇警匪片，包括李修賢套《公僕》、「成龍大哥作品睇過超過十次」、《無間道》、《拆彈專家》、《怒火》、《十萬火急》、《救火英雄》、《海關戰線》等，仲話自己每當情緒低落時都會翻睇！講起近年本港警匪片，不得不提《寒戰》，鄧炳強話睇戲時「幻想自己好似劉德華咁，做到保安局局長就好啦，最後夢想成真！」

鄧炳強亦分享自己好鍾意聽經典歌曲，包括《獵鷹》主題曲《胸懷大志》、《誰能明白我》、《真的漢子》、《我是中國人》，覺得呢類型歌曲好慷慨激昂，帶來正能量。佢仲透露自己因為睇咗《獵鷹》，激發到佢想做警察，同劉德華一樣都係讀完大學之後考幫辦（督察）。佢喺節目尾聲點咗《胸懷大志》送俾一眾紀錄部隊執法人員同佢哋家人，希望鼓勵大家士氣，呼籲大家緊守崗位，得到家人支持。

節目主持 2021 年被撤換

《瘋 Show 快活人》是港台長壽節目，由 1992 年播出至今，歷屆經典主持人包括梁繼璋與貴花田（陳寶玲）、梁思浩組成的三人組合。在 2021 年，當時主持節目的曾志豪及貴花田突然遭到解僱。其中曾志豪多年在港台電視節目《頭條新聞》飾演「小豪子」一角，經常幽默諷刺政府施政。其後貴花田、曾志豪、王耀祖在 YouTube 開設「田豪祖3寶channel」繼續於網上直播節目。