伍仲衡生日會收費惹熱議參加者被指係「水魚」 嬲爆反擊：生日都要開你拖

著名音樂人伍仲衡為TVB歌唱真人騷《中年好聲音》擔任評判後，人氣急升，日前與同為11月21日生日嘅「中一生」顏志恒舉行「NCH 1122 BIRTHDAY PARTY」生日會，筵開56席，近700名粉絲參與，車婉婉、Maria Cordero（肥媽）、張佳添、韋綺珊、周國豐、李麗霞、劉威煌、胡渭康、洪心怡、梁浩然、支嚳儀、涂家堯、魏嘉信及沈宗賢等人亦有出席，齊齊為伍仲衡和顏志恒慶生，除咗切蛋糕，亦有唱歌、玩遊戲及抽獎送禮物環節，場面熱鬧。不過，其生日派對收費惹熱議，每位參加者需支付680港元，有網民批評其收費標準，仲將參加者用「700條水魚」形容，令伍仲衡嬲爆親自留言反擊。

對於該網民嘅批評，伍仲衡列出各項開支反駁：「酒席每席$6,000，租樂器音響+5人樂隊開支幾萬啦，仲有大量禮物抽獎，玩遊戲又有歌聽，每位只收$680，點水魚呀！你返火星住啦，不知所謂！生日都要開你拖！」強調所有參加者都係自願參與，舉行生日會唔係為賺錢，亦冇錢賺，只係想同大家開party。此外，伍仲衡又批評該網民嘅外貌：「真係生日都要開你拖，入嚟我度搞事？未死過！大家認住呢件物體，醜樣嘅人見得多，真係未見過連個心都咁Q醜樣，個嘴真係似水魚。You are what you said!!」其後，相關帖文於社交平台上已刪除，不過伍仲衡直言唔係佢刪帖，而係Facebook因內容可能造成威脅而刪除：「話我冇所謂，話我啲fans係水魚，我同你死過‼️ 我冇刪Post, 係FB刪除的，理由係話我個Post可能會造成威脅，原來我這麼Lee High'。」對於此事，網民持唔同意見，部分網民表示支持伍仲衡，部分網民則認為伍仲衡回應過於激烈。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！