鍾雪瑩舊片翻hit 為陳奕迅MV剃頭 仲試過同古淖文陳蕾同台

連續兩年入圍金馬獎嘅鍾雪瑩，以《看我今天怎麼說》擊敗張艾嘉、歐嘉雯及吳君如等演技派前輩，喺人稱「死亡之組」獲得最佳女主角。

立志成為演員嘅鍾雪瑩，15歲就參加選秀節目，亦曾經做過商台DJ。有過唔少幕前演出嘅佢，成為影后之後當然立即被「翻舊帳」，唔少舊片段都被網民拎出嚟討論。

其中一條最爆嘅係鍾雪瑩為陳奕迅《致明日之舞》MV演出，飾演一個喺校園被欺凌嘅少女，入面更被剃頭剃到一忽忽，鍾雪瑩亦甘於犧牲秀髮演出，令唔少觀眾刮目相看。

鍾雪瑩做DJ時，不時被節目拍檔艾粒同網民拎返佢16歲參加亞視《亞洲星光大道3》嘅參賽片段嚟討論。2010年鍾雪瑩參加《亞洲星光大道3》時，被現時係TVB《中年好聲音》導師之一張佳添相中加入其組別，不過去到第8集就出局，以第16名「畢業」。鍾雪瑩之後喺《亞洲星光大道3》嘅聖誕派對同畢業演出，試過同陳蕾、古淖文以及而家係KOL嘅小花譚杏藍同台演出，而家個個都有一定成績，亞視其實好有眼光。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！