鄭中基自爆壓力太大患抑鬱酗酒逃避現實 鄭重向太太余思敏致歉 隻字不提經理人何慶湘

鄭中基（Ronald）成立的機動娛樂，為鄭中基的經理人、演藝事業公司，不單開設YouTube頻道機動電視台，上年更簽下了6名新人收歸其下，打算大力發展。不過日前（3日）Ronald突然於個人社交媒體宣布與經理人何慶湘割席，更指對方工作及道德操守有問題。

繼昨日發正式聲明，交代機動會繼續運作後，剛才（6日）鄭中基再發放長文，交代自己的健康問題：「大家平時見到我大癲大肺、拍搞笑戲、開channel拍片、開演唱會，表面上好似無嘢咁。其實咁多年黎我都仲係一個唔識得面對壓力同埋唔成熟嘅人。仲記得2000年我因為喺飛機醉酒鬧事，引致好多我嘅fans失望，仲有影響到我嘅家人，後來我決心戒咗酒，想要做一個清醒嘅人。之後喺無向公眾交代情況下，我經歷咗一段好短嘅婚姻，呢段婚姻令到我好唔開心，亦好好咁反省過自己嘅問題。」提及醉酒鬧事，及跟阿Sa離婚的重大事件。

「喺搞笑、娛樂大家嘅背後，係朋（友）建議下去咗睇醫生，發現咗有抑鬱症，當時靠食藥控制，然而我再次做咁個錯誤決定，選擇咗飲酒去逃避現實，太太都有同我講，我係自己呃自己。」明確表示自己有酗酒問題。

他並向太太余思敏，及一對子女道歉：「壓力終爆煲，用咗呢幾日時間好好反省自己，工作忙唔係藉口，唔識溝通就要去學識溝通，我覺得好對唔住我屋企人，尤其是我太太同仔女，對唔住！ 我會用時間同行動去證明我會努力做好丈夫、爸爸同鄭中基既呢個決心。」

最後他表示將會到美國參加戒酒中心療程，以解決自己的酗酒問題：「接下來我要去解決自己同公司嘅問題，我完成手上嘅工作後，太太會陪我去美國參加戒酒中心嘅療程，都50幾歲嘞，我要去諗清楚點樣去面對自己，然後先可以面對大家，我希望返黎之後可以做一個更好嘅自己。」

但整篇發文之中，就未有提及經理人何慶湘，及交待與她相關之事情。