酒店密會廖碧兒前男友 劉明軒被拍吻別盧啟賢

有線前主播劉明軒（Vivian），雖然佢由人妻變返單身，但係都不愁寂寞。過往已經曝光嘅男伴都係非富則貴，好似有銀行創辦者後人何乃斌、前夫係保險公司邦區域總監王傲山、上市公司非執董嘅盧永仁及廖碧兒前男友富二代盧啟賢（Calvin）。向來保養得宜嘅劉明軒，睇落一啲都唔似已經41歲，經常以戰鬥格打扮現身，近日又被傳媒影到佢同盧啟賢雙雙出現喺酒店。

根據傳媒報道指日前劉明軒揸車去酒店，交低架車俾酒店職員之後，佢就好匆忙咁入咗酒店。傳媒等咗一陣之後，劉明軒就同一個好有風度兼斯斯文文嘅男士傾偈，仲睇得出佢哋傾得好投契。事後發現呢位男士就係廖碧兒前男友盧啟賢。

傾完計之後，盧啟賢就好有風度咁送劉明軒出門口，除咗俾女士行先之外，佢哋以一個goodbye kiss作結。當劉明軒架車嚟到嘅時候，盧啟賢仲幫手開埋車門俾佢，同埋目送佢離開之後自己先上車。

外形俊俏、gentleman又有錢嘅盧啟賢，佢嘅家族生意包括保險及酒廠等等，喺全球多個地方都有物業，而家就住緊4千萬嘅豪宅。之前仲被爆出佢喺法國豪花2億歐元（約19.3億港元）狂掃香檳。至於感情方面，佢除咗係廖碧兒嘅前男友之外，佢曾經有過一段婚姻仲生咗一個囡囡，而家就傳同樣富貴嘅泰籍女友Nina拍拖。