重提舊情 輸畀方力申 張敬軒再追鄧麗欣:你揀番我囉!

軒仔與鄧麗欣拖住手仔話當年。
軒仔與鄧麗欣拖住手仔話當年。

張敬軒邀請了鄧麗欣做演唱會嘉賓,老友聚首當然要話當年,他公然拿鄧麗欣與方力申的舊情來炒熱氣氛。之後他坐上樂壇「關愛座」,指女團COLLAR送他的禮物似去老人院探病,非常有他老人家心。

張敬軒前晚第13場演唱會找來曾於電影《十分愛》合作的鄧麗欣(Stephy)做嘉賓,更拿她與方力申的過氣情史開玩笑。他指當年戲中有場追求Stephy的戲份:「佢呆咗咁望住我,我睇唔到你有愛嘅眼神,因為你當時望慣另一個靚仔嘛。」Stephy即流露少許尷尬神情,然後自嘲當年演技麻麻及劇情唔掂:「你咁有才華嘅靚仔,我喺戲裏面點解唔係揀你,揀咗阿力(小方角色)㗎?」軒仔笑言:「戲外十幾年後,你揀番我咪得囉!」全場笑爆。

COLLAR送禮似探病

之後Stephy送「大利是」給軒仔,男方笑言:「第1次喺紅館收利是咁正?你嚟做嘉賓應該係我封老毛畀你,唔係你畀我呀!」原來Stephy送其主演的電影換票證,軒仔當然答應捧場。Encore環節中,女團COLLAR驚喜現身,送了大籃醬汁給軒仔做禮物,軒仔即自嘲是老人家:「各位睇吓,依家啲後生送禮好似去老人院探病咁,我呢位院友多謝咁多位義工,叔叔降返落台先,轉頭帶你哋去睇金魚。」COLLAR跳唱首本名曲《Call My Name》,但表現失準多次走音,被網民批評未有資格登上紅館舞台。

另外,COLLAR昨日出席ViuTV綜藝節目《我哋係COLLAR》記者會,節目記錄她們成軍過程及鮮為人知一面,成員Day被大家選為「豬隊友」,因經常撞到周身瘀。談到為軒仔個唱做嘉賓,她們感謝前輩給予機會,希望年底舉行首個演唱會,若能請得軒仔做嘉賓是很大榮幸。

COLLAR送上大籃醬汁,被軒仔取笑似去老人院探病。
COLLAR送上大籃醬汁,被軒仔取笑似去老人院探病。
Day(左二)被公認是豬隊友。
Day(左二)被公認是豬隊友。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能