金宵大廈2丨曾展望演技自然獲讚賞 現實原來係七品道士

由陳山聰、李施嬅主演的《金宵大廈2》喺上星期首播，劇情懸疑又緊湊，每集都掀起網民熱烈討論。劇集首個單元故事「七樓半」搵嚟于洋、鄭子誠及曾展望飾演殯儀業三爺孫，網民除咗大讚老戲骨于洋及鄭子誠之外，曾展望嘅演出同樣獲得網民讚賞。

單元「七樓半」喺首集登場，劇情講述陳生力（于洋飾）、陳喜力（鄭子誠飾）和陳健力（曾展望飾）三爺孫係喺金宵大廈裏經營無牌龕堂「福佳堂」，而呢個單位係阿爺與三名朋友以長命契方式買入一個單位，朋友逐一離世，只係剩下佢同一個朋友白威（陳狄克飾）。不過可惜鍾意飲珍珠奶茶嘅阿爺意外被鋼飲管插死，仲成為詐屍。阿仔同孫仔就為單位嘅業權而不顧親情，刻意隱瞞阿爺已經死去。之後，被誤闖七樓半嘅Ella（李施嬅飾）意外揭破秘密，阿仔欲下毒手殺死Ella，而Ella成功被Maurice（陳山聰飾）救走。阿仔同孫仔返回骨灰場後，發生離奇嘅「人體自燃事件」，二人與阿爺齊齊被燒死，沒法繼承單位業權。

唔少網民睇完佢嘅演出後，留言大讚佢，例如「估唔到曾展望做得咁好很自然沒有造作 有前途」、「曾展望做得好好」、「接龍阿Mike有驚喜, 請多用年青人」、「唔似24歲咁細個 演戲自然又入戲，加油！」、「曾展望加油。佢都有喜劇演員嘅潛質。」、「好好睇，估唔到曾展望演得咁好！」及「三爺孫好鬼馬，老中青都演出得好好，又搞笑又驚嚇，曾展望加油，你的表現不輸給兩位大師，很喜歡你的表現」等等。

喺劇中飾演孫仔嘅曾展望，喺現實生活中係一個後獲七品道士認證嘅真道士，之前佢仲喺《#後生仔傾吓偈》時透露自己20歲嘅時候前往內地一星期，考試過程亦非常嚴格，每日朝早6點至晚上9點都要聽大師講經，如果期間瞌眼瞓就會被敲醒及罰跪香。

現年24歲嘅曾展望（GM）畢業於香港理工大學會計系，上年4月正式簽約成為無綫旗下藝員。除咗係《#後生仔傾吓偈》「後生仔」成員之一之外，GM仲獲安排喺《Think Big天地》及《不能只有我看到的便利店追女神食譜》擔任主持。GM仲有參與唔少劇集拍攝，例如《救妻同學會》Parker助手、《星空下的仁醫》年輕版況叢昕、《愛·回家之開心速遞》Mike、《金宵大廈2》陳健力及代播劇《法證先鋒V》周卓軒等等，上年更入圍《萬千星輝頒獎典禮》的「飛躍進步男藝員」。另外，無綫早前推出嘅10人限定男團Super Tiger，由曾展望、羅天宇、許俊豪、丘梓謙、鄒兆霆、林俊其、魏柏豪、劉展霆、李紹堅及宋懿芳組成，佢哋喺賀歲節目《恭喜發財好運來》壓軸跳唱兩首歌曲，發展相當不俗。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！