金宵大廈2 | 有過去的女人 伍詠薇首任丈夫新婚2周猝逝 曾被傳繼承億萬遺產

《金宵大廈2》嘅單元《雙魚》尋晚完結，雖然只有2集，但係伍詠薇演繹出角色芬姐嘅瘋狂病態，令唔少觀眾大讚出色。53歲嘅伍姑娘向來予人風騷爽直感覺，原來佢二十出頭已經經歷喪夫之痛。

1989年，年僅20歲嘅伍姑娘喺雜誌派對上認識比自己年長31歲嘅會計師樓合夥人翁江培，拍拖後翁鼓勵伍姑娘參加亞姐，而伍姑娘亦順利打入當屆5強。選美時成為大熱，令伍詠薇入行後嘅機會接踵而來，但伍姑娘無懼事業受影響，於1990年底與翁江培結婚。

豈料結婚13日後，伍姑娘北上深圳登台演唱期間，翁江培因心臟病發送院，搶救後不治。摯愛猝逝令伍姑娘大受打擊，加上被人指責剋夫，令佢幾乎精神崩潰，並一度酗酒。更心痛係經常有人以為翁江培留下過億遺產俾伍姑娘，但事實上翁離世時伍姑娘只有大筆卡數同少量積蓄，翁家人更拒絕俾伍繼承財產，最終打咗十年官司先至拎返法定所得嘅900萬。

伍詠薇早前受訪時承認，事隔多年仍然掛念翁江培，稱先夫係明燈同真愛，教識自己好多嘢，亦無悔有過呢段婚姻。

回復單身嘅伍詠薇試過同廿幾位男士交往，更曾經搭上朋友丈夫，伍姑娘因為感到內咎而向對方太太認錯，不但獲原諒，更保住友情。1999年，伍詠薇同廣告人練海棠喺加拿大結婚，婚後練海棠曾被爆出軌，伍姑娘大方回應指老公應該得到教訓，更評價第三者身材唔錯，被盛讚答得得體！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！