海膽主題！食勻赤黃紫白4款海膽+自選食法 銅鑼灣新開Fusion居酒屋

熱愛海膽嘅話，唔好錯過銅鑼灣呢間以海膽為主題嘅摩登居酒屋啊！選用新鮮日本直送海膽入饌，創作出多款西日Fusion菜式，包括海膽魚子醬帶子意粉、唐揚免治雞肉海膽流心蛋等。亦可以選擇原板海膽刺身或海膽八食，體驗多重享受。

赤、黃、紫、白四款海膽各有特色

「U IZAKAYA」位於銅鑼灣，新張以海膽為主題，日後更會按季節另外推出唔同時令食材主題，例如香箱蟹、秋刀魚等等。海膽菜式選用嘅種類亦會按季節調整。赤海膽棲息於九州沿岸、甜味強烈，由於稀有更被稱為「幻之海膽」；黃海膽口感細滑、入口即溶，味道濃郁甘甜；紫海膽肉呈淡黃色，口感清爽、海水味較重；白海膽又名北紫海膽，帶清淡甜味。

海膽8款食法任你揀！

原板或半板海膽刺身有八種食法：壽司、手卷、茶碗蒸、天婦羅、甲羅燒、野菜鍋、立鱗燒、魚子醬帶子意粉，可以按喜好選擇一款。另外亦有海膽刺身3食，即係手卷、茶碗蒸、天婦羅。手卷簡單以香脆紫菜，襯托出海膽嘅細滑口感；茶碗蒸選用日本德島縣雞蛋同三文魚子，鮮味加倍；天婦羅外層酥脆，咬開裡面係綿密爆漿口感。

海膽入饌西日Fusion菜

每條意粉都掛上橙黃色嘅海膽醬，再加上以牛油煎香嘅帶子、新鮮海膽、意大利魚子醬，每啖都能夠品嘗唔同層次嘅海洋鮮味！特別係餐廳自家調製嘅海膽醬非常濃稠Creamy，帶出海膽嘅甘甜滋味。

唔好以為海膽流心蛋就係海膽加蛋咁簡單，師傅特別先用針筒抽出溫泉蛋嘅蛋黃，製作成海膽蛋黃醬再重新注入雞蛋裡面，然後包上免治雞肉同麵包糠，炸至外層金黃香脆，而裡面嘅海膽蛋黃係半熟！口感層次分明，而且德島縣雞蛋嘅濃郁蛋香同海膽亦非常夾。

Happy Hour最啱～海膽生蠔Set

海鮮控就可以點呢個套餐，包括一杯清酒，日本直送海膽刺身，六款生蠔：南非活蠔 Size No.3、蘇格蘭石蠔 Size No.3、愛爾蘭石蠔 Size No.4、法國洛曼第活蠔 Size No.3、法國活長蠔 Size No.3、法國黑珍珠蠔 Size No.3。可以試到唔同產地品種嘅生蠔嘅唔同風味。

選用用日本大分縣嘅海膽豆腐，炸過再放上新鮮海膽。Bite Size可以一啖食到豆腐嘅外脆內嫩，同海膽嘅幼滑鮮甜，令人印象深刻。

以日本青森縣同九州嘅甘鯛為主角，師傅先用油炸令魚鱗豎起然後再焗，呢個立鱗燒方法可以令魚鱗酥脆、魚肉細滑。配上海膽醬同海膽珠，後者以海膽醬同海藻製作而成，咬落好似三文魚子咁會有爆汁口感，增添鮮味同口感層次。

必試自家製海膽雪糕

唔單止小食、主菜，連甜品都見到海膽嘅身影！餐廳自家全人手製作嘅海膽雪糕用咗海膽醬、牛奶、忌廉、雞蛋、糖，口感雖然無坊間一般雪糕咁幼滑，但冰感亦唔算重，同樣做到入口即溶。而且海膽風味突出，作為海膽大餐嘅結尾最好不過。

居酒屋料理+創意菜式推介

海膽菜式以外，亦有多款日式居酒屋料理同Fusion創意菜式。例如蘋果豚肉卷同意瓜芝士卷兩款就分別以蘋果同意大利青瓜平衡豚肉同芝士嘅膩感，惹味而不失清爽。厚切牛舌芯肉嫩彈牙，雞心元亦外微焦內細嫩，師傅火候掌握得宜。

以米紙包住西班牙火腿、羽衣甘藍、紅象菜、九芽菜同自家製芝士醬，芝士醬用上四款芝士：英國藍芝士、英國水牛芝士、英國車打芝士、法國Comte芝士，芝士味道濃郁。西班牙火腿味道甘香，而三款蔬菜就可以大大減低油膩感，係一道清爽醒胃嘅小食。

用法國鵝肝煎至半熟，配搭焗至香脆嘅法包、新鮮無花果、自家製無花果醬。無花果相當香甜多汁，襯托出鵝肝嘅柔滑甘香，食完依然口齒留香。

U IZAKAYA

地址：銅鑼灣耀華街38號ZING!10樓

新張訂座優惠：主餐牌正價8折

文：Cathy.H

相：Sunny