雅虎香港新聞 【錦繡南歌】唔止李沁 嚴選劇中6大美女 尋找下一個楊冪
TVB今期黃金時段播內地劇《錦繡南歌》，劇集沿用人氣劇《錦繡未央》班底，不過早前推出嘅時候，無論評價定係點播率都相當一般。香港版《錦繡南歌》有48集，似乎有排捱，好在內地劇總係有唔少女角令人眼前一亮﹐正如TVB 播2006年內地版《神鵰俠侶》，唔少眼利巴打就發現演郭襄嘅楊冪一樣。睇吓《錦繡南歌》呢6位美女又會唔會成為巴打女神。
李沁（飾沈驪歌）
喺《錦繡南歌》孭飛嘅李沁，早於半年前播嘅《慶餘年》已經令人眼前一亮。今次演命途多變嘅俠女沈驪歌，造型跟隨劇情轉變，由蒙面冷艷到宮廷妃嬪華麗貴氣風格都有，繼續展現李沁嘅古典美。
送多張時裝造型照，李沁其實可塑性幾高～
關雪盈（飾沈樂清）
女角多嘅戲總會有一個善妒嘅角色，《錦繡南歌》亦唔例外。本來係萬千寵愛嘅沈家千金小姐，因為驪歌嘅出現而變得工於心計。呢類註定被觀眾鬧爆嘅人物由關雪盈飾演，之前佢喺《如懿傳》飾演乾隆嘅嫡公主璟瑟，但係最注目嘅演出可能係《通天狄仁傑》嘅飛紅衣一角，你睇！
杜雨宸（飾謝韞之）
彭城王王妃，典型東宮要有嘅性格都有︰知書識禮、溫婉嫻淑、貴氣大方，因為夠討好所以微博關注度大增，估計亦會幾受觀眾歡迎。
杜雨宸換返時裝造型，即刻大曬長腿，加埋gf－able氣質，冇得輸！
龍政璇（飾王子衿）
驪歌好友，朝廷重臣王勉嘅千金，個角色條感情線本來係甜嘅，但係下場……唉，唔劇透自己睇啦。龍政璇對比同劇女角唔算最搶眼，但屬於清麗脫俗嗰批，而且「人工味」無咁重。
田曦薇（飾陸婉）
反派陸遠個妹，本來係「好pure好true」少女，但後來性格似乎會有改變。22歲嘅田曦薇係呢幾位女角之中最年輕，眼大大而且演妹妹角色，惹人由憐生愛冇難度。
文竹（飾梅綺）
古裝劇必備爽朗傻大姐角色，戲份未必多但演得好就足以突圍。文竹劇中造型俏麗，又唔駛同其他女角鬥生鬥死，可以話係小清新。有傳文竹已經低調結婚，會唔會令觀眾對佢更有興趣？
