鍾嘉欣初入行好聽話 公司叫做乜就做乜自嘲似隻牛

靚媽鍾嘉欣最近經常拍片更新個人影片頻道，早前佢就邀請超級粉絲Queenie同佢一齊喺酒店聚餐。喺第一集，佢哋大談以前粉絲等待佢嘅經過同難忘回憶，即使佢離開娛樂圈一段時間，但粉絲們依然對佢不離不棄，令佢非常感動。嚟到第二集，嘉欣BB除咗講咗好多感性嘅說話之外，佢仲話自己以前好聽話，同埋覺得自己性格似一隻牛。

喺第二集開始，Queenie被問到過往有冇一啲嘢係唔想鍾嘉欣做，Queenie就回答話係歌曲《火柴天堂》，原因係呢首歌透唔到氣，同埋唔知個MV做緊啲咩。鍾嘉欣直言自己當時只有24歲，其後仲反問自己當時做緊咩。之後佢再話：「但係以前嘅我，你叫我做乜我就做㗎啦，我完全冇「NO」呢個字。你叫我做，我就做㗎啦嘛！其實我性格有少少似牛，總之你要我做牛做馬，我就做牛做馬，你明唔明呀？要做咪做，仲諗咩，仲有另外嘅選擇咩？冇㗎喎！即係嗰時公司叫我做乜我就做，做到自己攰到爆、病同精神分裂嗰啲囉。」

佢仲同大家分享：「逆境每一個人都會遇到，你有兩條分岔路，一條就係你諗係一個學習經驗，你就會好珍惜嗰個過程，你會能夠從苦難中搵到喜與樂，或者可吸收到智慧；但當你揀選咗負面嘅路，你就好容易走入一個受害狀態...你就會陷入呢個漩渦，慢慢會愈來愈負面，你會錯過成長嘅經歷。如果你嘅狀態跌到去谷底時，就會好難爬返上去。所以我會建議或鼓勵大家，兩條路點都要行，行唔返轉頭，有啲事要發生，你就讓佢發生。」

另外，佢哋仲傾到嘉欣囡囡Kelly，Queenie仲話見到Kelly嗰樣時好激動。嘉欣即時順勢問似佢定老公多啲，Queenie就話一出世就似佢老公，長大後開始似嘉欣。之後，嘉欣好開心咁話：「多謝！我覺得Kelly兩個都似，因為佢好需要有我老公嗰種少少嘅混血，導致佢有一種獨特嘅氣質，所以係好事。佢亦有我老公皮膚白，但係佢有我嗰種精靈活潑同可愛，同埋佢講嘢好似我，我諗性格都有啲似我！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！