鍾意講粗口？好夜瞓？間房好亂？ 研究話有以上特徵IQ較高

係咪成日被阿媽罵你唔執房呢？又有無試過三間半夜仲未瞓， 臨時臨急趕功課開OT？然後就忍唔住要爆幾十句粗口發洩吓呢？如果有齊呢三項特點，通常被人覺得你無手尾、低效率同埋好粗俗，但係原來咁嘅人先係IQ更高。

夜貓＝智力高？

一項大型追蹤性研究搵咗20,745個青少年做研究，分析佢哋童年嘅智商同成年嘅睡眠時間，發現童年時IQ低於75（ 被視為「非常蠢」）嘅人，成年後平日平均夜晚11點41分就訓，但是童年時IQ高過125（被視為「非常聰明」）嘅人，成年後平日平均去到凌晨12點29分先訓。

點解會咁？因為夜媽媽先嚟做嘢，個腦被迫喺應該要休息嗰陣Function，所以會更加訓練到個腦。嗱，連奧巴馬、邱吉爾同達爾文都係夜瞓一族，阿媽你唔好再話我咁夜仲唔訓喺到Hea，我係思考緊人生，提升緊IQ。

講粗口＝語言IQ高？

講粗口成日被人話粗俗，得啲教育水平低嘅人先會講。Nonono，刊登喺《Language Sciences》嘅一個研究，發現一分鐘內講得越多粗口反而IQ更高。因為呢啲人嘅詞彙畀一般人多，第1個測試中43個參加者竟然夾埋講到533個唔同嘅粗口/ 咒罵說話。嘩，我數嚟數去最熟都係廣東話嗰「五字真言」咋，我認輸啦。

而參與者亦都要接受FAS 語言流暢度測試，越識講唔同粗口，語言能力就越高。之前套《 皇上無話兒》，連英國國王都靠爆粗改善口吃問題，所以講粗口唔一定代表無文化，人哋可能連文言文粗口都識呢，例如你又知唔知咄咄逼人個「咄」字係古代嘅優雅式「粗口」？

間房亂＝有創意？

心理學專家Kathleen Vohs發表咗個研究，話張枱好亂其實代表你IQ高，因為如果你無哂好多時間執嘢，代表你個腦諗緊更重要嘅嘢。而且，混亂嘅工作環有助打破傳統規矩，刺激創意添～

嗱嗱嗱，專家講架，我唔執嘢唔係因為我唔企理，係我唔想浪費啲時間去做無謂嘢～唔好再話我啦，下個喬布斯可能就係我啦！