長壽秘訣?女人做多啲家務,男人就做花王

image

日日做家務覺得好辛苦,覺得咁樣操勞法應該命都短幾年?NoNoNo,咁諗就錯哂啦,只要你係女人,做得多家務反而會長命啲;但如果你係男人想長壽,去做花王啦!

荷蘭有一項研究,用咗幾十年去追蹤7,000個男女嘅生活模式,發現55歲好少做家務嘅女性預期壽命只有83歲,而密密洗衫煮飯打掃嘅女性預期壽命反而有86歲,足足多咗3年命。而男人都一樣架,如果男人做多啲家務,都可以有多1年命。嗱,又係好時機叫老公老婆一齊分擔家務啦~

不過相對於做家務,男人如果鍾意打理吓花花草草,種吓嘢,做吓花王呢,延長壽命嘅效果會更好,可以有多2.7年命。之但係,你屋企有無大大個後花園畀你做花王先?樓都未買到,買到都唔知有無400呎,仲同我講花園?都係乖乖哋返去做家務啦。

以後做家務覺得辛苦,咪安慰自己咁樣可以長命啲,又或者用嚟做氹另一半做家務嘅好理由。但其實咁長命有咩用,又唔係日日可以嘆世界,只係日日做到成隻積咁……