雅虎香港新聞 【開心速遞】《愛回家》廢青安仔成功入屋 5點讓你認識TVB處境劇小生周嘉洛
TVB 處境劇嚟講，《愛．回家之開心速遞》都算係高質，劇本貼地得嚟，一班演員亦相當有火花。前輩級演技超班，後輩級就演得夠放，當中就以大學四子最搶眼。劇中飾演滕麗明兒子金城安（安仔）嘅周嘉洛越演越搶Fo， 將「廢青」演釋得淋漓盡致，討喜又唔令人討厭 。你們都想更深入認識呢位新生代可愛 「廢青」嗎？
早前《愛．回家之開心速遞》播出嘅單元「廢青再培訓」（上、下集）笑點勁多，安仔大戰女友Bonnie爸爸譚道德（陳榮峻飾），一幕幕爆笑場面，獲不少觀眾大讚。
一個係嚴「叔」、一個係廢「青」 ，兩人擦出不少火花 ！安仔被譚氏夫婦禁室再培訓，悶到開Live, 豈料誤打誤撞直播埋世伯全裸，呢幕亦係令小編笑得最癲一幕。
安仔「廢」到連最親嘅熊家都嫌棄，二姨熊若水（呂慧儀飾）鬧佢鬧到有口頭禪「乜大學咁教你㗎咩？！」
安仔做「廢青」盞鬼， 而佢同朱凌凌（吳偉豪飾 ）嘅兄弟情亦一樣好睇，兩個年紀相若嘅小鮮肉走埋一齊，有時仲Sweet過安仔同女友Bonnie。（hehe～）
（hehe～） 維基百科入面，甚至有人擺明惡搞，話周嘉洛現時男友係吳偉豪添。
對於這位「廢」得來帶點可愛的安仔，大家有興趣更深入認識他嗎？
1. 90後小鮮肉
金城安大家就叫得多，安仔真名其實叫周嘉洛,1995年出世，香港仔一名，中三之後就去過澳洲 留學。
細細個就已經鍾意演戲，係學校劇社活躍成員，仲連續三年奪得香港學校戲劇節「傑出演員獎」。
小鮮肉想喺呢行立足，無返排肌肉傍身又點得呀？ 周嘉洛表面上有啲似孱仔，但原來內有乾坤，拍埋吳偉豪度都唔輸蝕。
2. 藝員訓練班入行
周嘉洛2015年係喺家姐鼓勵下參加《第28期藝員訓練班》而入行。
有份參演《愛．回家之開心速遞》嘅吳偉豪同招浩明都係呢一期藝訓班畢業，同周嘉洛做完同學再做拍檔。
入行至今，周嘉洛嘅角色都係行行企企居多，直到2016年，演出《愛·回家之八時入席》先開始更多觀眾認識。
3. 現實中一樣招積
廢青安仔喺劇中成日認屎認屁，原來呢方面同現實中嘅周嘉洛好相似。
周嘉洛曾被爆有人尊稱佢做「嘉洛哥」甚至「家洛爺」，叫得阿哥、阿爺當然唔只係一份尊重咁簡單。
《愛．回家之開心速遞 》飾演佢幾位好兄弟嘅朱凌凌、傻強同阿壯都要睇佢頭！佢自己都認為人比較囂張、不知廉恥。
4. 好朋友係「博士」
唔係話有博士學歷，而係講緊《愛．回家之開心速遞 》入面嘅「博士」秦博思（馬貫東飾）。
安仔最好嘅朋友唔係朱凌凌咩？！
翻開周嘉洛IG （@kalok_），就會發現入面出現得最多嘅男性朋友係馬貫東。
可能係因為喺《愛·回家之八時入席》已經接觸得多，所以特別投契？
兩人經常互Tag, 更會互相影靚手，攝影似係佢地嘅共同興趣。
5 . 戀愛經驗淺
劇中Bonnie係佢初戀，好多小事上都展露出佢嘅拍拖經驗值係幾咁低。
23歲嘅周家洛青靚白淨，有樣有肌肉，性格突出有自信，咁嘅條件，追女仔應該唔難。
不過原來佢嘅戀愛經驗並唔多，只係拍過3次拖，仲要全部都係Puppy love嗰隻, 快來快去。
《愛．回家之開心速遞》令周嘉洛有更多人認識，TVB一眾潛力小生嚟講，佢都算係Cute嗰type。
知名度高咗，會唔會識女仔都容易咗？
代一班姐姐級觀眾問周嘉洛一句：「姊弟戀你OK嗎？」XD
推薦閱讀:
➤ 真實形象大不同！憑《愛回家》毒男傻強一角深入民心，馮奕森︰我其實都唔係咁毒﹗
➤ 母子戀咁爆？！《愛．回家之開心速遞 》傻強戀上熊尚善 毒男真身兩個樣
➤ 【捕實電視機】新是非精登場！《愛回家》校園女神鄺潔楹的5大背景你要知
Follow us on:
Facebook: CosmoHK
Instagram: @cosmopolitan_hk
YouTube: CosmopolitanHK
