關智斌輸錢鬧情緒 阿Sa打慣台灣牌 拒同男友過招

蔡卓妍（阿Sa）前晚與老友關智斌（Kenny）出席時尚活動，透露於內地工作期間經常打麻雀，牌章高又有運的阿Sa經常有斬獲，撒嬌否認被麻雀館太子爺男友訓練有素，更指習慣打台灣牌，不會跟男友「過招」！

阿Sa、Kenny、鄭欣宜、林愷鈴與魏浚笙等前晚出席服裝品牌發布會，阿Sa透露與Kenny之前在上海工作，因住同一幢大廈經常見面，Kenny經常到她單位「黐餐」，感覺似住青年宿舍。談到有何消閒活動？他們表示打麻雀聯誼，Kenny說：「我哋都係牌品好、人品好，唔係點坐埋一枱呢！」阿Sa則說：「佢哋打得好大，我打慣台灣牌好細，但佢哋又唔肯，如果唔同佢哋打會周圍唱我，依家我遷就佢哋囉！不過大家都係志在玩，塘水滾塘魚居多。（打牌傷感情？）唔會嘅。」Kenny即反擊說：「我當然有情緒啦！成日輸錢畀佢，佢每次都贏錢梗係開心冇情緒，佢又好運，又有技術。」

盼張致恒生性

阿Sa被問可會與男友石恆聰打麻雀？她表示：「佢屋企開麻雀館，但只係打廣東牌，所以唔會一齊玩，其實阿嬌（鍾欣潼）打牌打得最大，容祖兒因為冇耐性，所以唔鍾意打麻雀。（三缺一點算？）會叫司機同助手一齊打。」談到同公司的張敬軒快將開騷，問Kenny可會做嘉賓？他笑指尚未收到對方邀請，但會跟同事一齊捧場，阿Sa則稱要返內地工作，無緣觀賞。此外，提到昔日同門張致恒傳離婚，阿Sa語重心長表示：「希望所有人都好，最重要係小朋友，始終朋友一場，生生性性啦！」

欣宜自認多老公

將於明年3月舉行演唱會的欣宜，預告製作不惜工本，務求令觀眾享受最好的視聽效果。問到可會邀請「老公」Anson Lo擔任嘉賓？她笑言有很多老公。問到可有欣賞對方的新劇？她說：「未，網上好多片段好搞笑，我都好想睇。（唔掛住『老公』咩？ ）有冇問吓我啲老公有冇掛住我先？（想同佢合作拍劇？ ）有好嘅劇本同角色都可以。（做佢老婆？ ）咁易畀你哋估到就唔好玩啦，可能我做老闆娘，佢係我嘅員工。」