阿儀出賀年歌《財神888》 MV風格靈異仍獲網民支持：Collar有對手了

「亞視一姐」薛影儀（阿儀）因上年參選亞洲小姐而爆紅，落選嘅阿儀其後與ATV簽約並獲得力捧，工作接踵而來。除咗出席宣傳活動、初嘗拍電影及廣告之外，最近阿儀仲連同四位亞姐推出虎年賀年歌《財神888》，喺今個疫情期間嘅農曆新年，為大家增添歡樂氣氛。

喺噚日（26日），亞視喺社家網站上載一條由阿儀及四位亞姐（陳美濤Tomato、林海茵Karena、譚夢娜Moonna及張可盈Natalie）主唱嘅賀年歌《財神888》MV，影片中阿儀化身財神爺，而亞姐們就著上旗袍，非常有新年氣氛。至於歌詞方面，《財神888》可以話係為阿儀度身訂造，有網絡潮語「阿儀不紅，天理不容」，並由四位亞姐不斷唱出。今次阿儀除咗可以大展歌喉之外，仲有得唱埋rap。唔少網民睇完MV都話好正，紛紛留言支持阿儀，例如「聽完阿儀唱 好想每日都過農曆新年 有呢首歌日日陪住我感受到喜悅」、「新一代樂壇天后」、「正到核爆！阿儀好正！」、「樂壇欠呀儀一個肯定呀」、「Collar有對手了」、「樂壇又有一場腥風血雨」及「今年最佳新人仲唔係佢？」。同時亦有網民認為阿儀嘅畫面實在太少，希望亞視可以出一個阿儀嘅獨唱版本。

另外，今次呢個MV風格非常迷幻，令呢個賀年MV增添唔少靈異色彩，唔少網民都話恐怖同好有鬼片嘅感覺，留言話：「這是陰陽路之財神888嗎？」、「個影片風格整到咁恐怖做乜」、「係咪睇緊恐怖片」、「拍到鬼片咁」、「d鏡頭影到盂蘭節咁」、「可以將首賀年歌搞到咁鬼靈異，果然只有ATV才可超越ATV」及「鬼影重重，好驚呀！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！