阿Mo李啟言IG發舊日跳舞片段 女友So Ching表達掛念 事故2年後身體逐漸有感覺

2年前嘅7月28日，MIRROR首次紅館演唱會嘅第四場發生嚴重事故，大型屏幕從高處墮下，導致舞蹈員李啟言(Mo)及張梓峯（阿峯）受傷，頭頸被擊中嘅阿Mo至今仍然接受治療。事發兩年幾，阿Mo嘅IG帳戶鮮有更新，而佢尋晚終於再度喺IG發限動，post咗2條出事前跳舞嘅片段，但未有寫上任何文字。阿Mo女友So Ching（蘇芷晴）都有轉發呢個限動，並寫上Miss This，意指懷念當時片段。

去年7月28日即事故發生一年當日，阿Mo於凌晨時份更新IG限時動態，貼上打氣表情符號，係佢出事後首次喺IG更新。阿Mo出事後女友So Ching一直照顧，並於去年5月宣布退出女團COLLAR。

阿Mo出事後，佢父母由加拿大回港照顧，Mo爸爸李盛林牧師每周發文交代阿Mo康復進展。最近一次嘅文章提到，阿Mo嘅左右上胸同手前後臂嘅感覺已經回復八成甚至完全恢復，身體上有感覺嘅部份亦以緩慢速度慢慢增加。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！