【陳偉琪疑轉行】藝人轉行做公關 向海嵐退出幕前上海打工 呢位前港姐做埋老細

有傳之前因為醉駕而被TVB雪藏嘅陳偉琪，主動向公關公司毛遂自薦，似乎有意轉行，自己前途自己救。佢喺《愛回家之開心速遞》嘅角色「細龍太」，已經被「安排」飛去美國，仲未有歸期，但係劇集監製就話「遲下佢會出架啦」。

藝人轉行個案唔少，由出席活動嘅藝人轉做接洽藝人搞活動嘅公關都大有人作，畢竟做幕前見人多轉數快又識打關係，做PR啱晒！

向海嵐

1998年參加港姐贏得冠軍，喺TVB 十年期間發展唔錯，好快就喺《楊貴妃》做女一，劇集平均收視33點，堪稱一劇彈起；而演奸角嘅《無頭東宮》都有不俗收視，可以話係古裝劇女角不二之選。不過入行十年後，2008年宣布退出幕前，轉行去上海著名商業區「新天地」做公關。向海嵐解釋，當時覺得事業去到樽頸，覺得有需要改變，咁啱有機會就毅然轉行。做咗7年公關，向海嵐決定復出幕前，因為做公關嘅經歷令佢發現太穩定嘅工作唔啱自己，而且對演戲仲有熱情！

張詠恩（Jan）

前女團Krusty成員，歌唱事業發展平平，而且有感才華有限，唔想「呃飯食」，於是同唱片公司解約，並且得到公司介紹轉做時裝品牌公關，由零經驗從頭學起，7年後成為負責品牌兩岸三地工作主力，但係因為壓力太大而辭職。其後同朋友自立門戶開公司搞宣傳同活動。

張文采

記者轉行做公關比比皆是，TVB新聞主播張文采經歷十年幕前生涯之後，喺舊年11月遞信辭職。張文采接受訪問時提到工作雖然有挑戰性，但係每更工作十個鐘，體力開始難以應付，而且冇理由等到40歲先走人，於是喺入行十年轉工，加盟公關公司主攻推廣醫藥產品。

周美鳳

由幕前轉做公關嘅藝人之中，周美鳳係做得出色嘅其中一位。1986年做緊酒店嘅時候報名選港姐，成功打入決賽但後來退選，之後轉投亞視，做過深夜節目《活色生香》主持。1996年周美鳳開設公關公司，幫唔少大品牌做推廣，喺行內有一定地位，近年仲做埋財經公關生意，越做越大。

丁子高

睇楊千嬅喺演唱會唱老公「名作」《寒冰掌》，大家都記得丁子高曾經係男團VRF成員，但係發展麻麻，出過2張唱片就散band。之後丁子高轉行做PR，由主任級做到高層，得到行內大公司賞識合作開公司自立門戶，近年開埋經理人公司，梗係主力「湊」老婆千嬅啦！