陳婉婷獲七仙羽教「七連閃電鞭」後轉運成功 直播廣告被指與Do姐撞樣

有「TVB御用丫鬟」之稱嘅陳婉婷（Hebe）早前上ViuTV節目《七救星》做嘉賓，希望風水師傅七仙羽（七師傅）可以一洗「妹仔」命格，期間師傅親自教授絕學「七連閃電鞭」，最近有指Hebe轉運成功，工作一個接一個，收入比之前可觀。現年32歲嘅Hebe樣子甜美，不過佢喺一個直播廣告嘅外貌就引起網民熱烈討論，除咗話佢俾真實年齡老之外，仲話佢個樣好怪及有啲似鄭裕玲（Do姐）及已故國際巨星Michael Jackson。

陳婉婷喺2011年透過TVB周刊CoverGirl選舉後加入演藝圈，畢業於第25期無綫電視藝員訓練班，Hebe多年嚟參演過唔少劇集，不過都係經常飾演丫鬟或者下人，例如《初五啟市錄》、《末代御醫》、《​​丫鬟大聯盟》及《大醬園》等等，所以被封為「TVB御用丫鬟」。Hebe喺2019年宣佈離巢，上年開始更有喺ViuTV劇集及綜藝節目出現。喺經過七仙羽加持後，Hebe仲話「廣告費係咁升係咁升，升到我都唔相信！」 。

除咗做藝人之外，Hebe亦係一名直播主，更被直播平台封為「2020年香港甜心主播 冠軍」，至今已經擁有大約三萬個粉絲支持。早前佢喺直播平台拍攝廣告時就話最近忙於拍電影、劇集及直播。不過呢個廣告出街後，唔少網民都focus喺佢個樣度，指佢同平時個樣唔同、俾真實年齡老、與Do姐及已故國際巨星Michael Jackson撞樣。另外，有網民更笑問佢係唔係俾七師傅嘅七連鞭打到咁樣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！