陳思齊上《Mean傾》大談離巢後發展 由演員轉行做「骨妹」

Yahoo TV 自家製娛樂節目《Mean傾》，最新一集就邀請咗黃翊、陳思齊及游飈作客，佢哋都係選擇離開娛樂圈，轉行尋找第二人生，今集就講下佢哋點解會轉行。

有「翻版朱玲玲」之稱嘅陳思齊(原名陳凱怡)於2000年參選港姐入行，當年被視為大熱人選，可惜最後五甲不入。陳思齊加入無綫後，參與唔少劇集拍攝，先後拍過《皆大歡喜》、《足秤老婆八両夫》、《學警雄心》、《我的野蠻奶奶》、《法證先鋒》、《神探高倫布》及《巨輪》等等，演技方面都獲得好評。到咗13年同無綫約滿，佢就轉投港視拍咗幾套劇，可惜港視不獲發牌，之後佢同朋友投資咗幾十萬，喺尖沙嘴咀開咗間身心靈治療中心，佢仲會落手落腳幫客人按摩，由演員轉行做「骨妹」。

由於陳思齊睇落弱質纖纖，又有少少楚楚可憐嘅感覺，所以成日安排做「妹妹」或者「丫鬟」等角色，係無綫嘅「御用丫鬟」。不過陳思齊嘅年紀愈來愈大，佢明白唔可以成世靠樣搵食，而且愈來愈多樣靚身材正嘅妹妹加入無綫，佢明白到年紀大咗就無辦法再做妹妹角色，所以有離開演藝圈意欲。佢考慮到自己性格比較正面，又帶到開心及正能量俾人，朋友亦建議佢做治療師，於是佢決心進修音樂治療及香薰按摩有關課程，而家已經係心靈治療師。不過陳思齊唔做男人生意，因為始終孤男寡女喺間房做治療，唔想任何一方蝕底，亦避免其他問題，所以有呢個決定。