難得與鮑起靜合作 王君馨「中頭獎」撐拐杖圓夢

藝人王君馨在新劇中跟影后鮑起靜飾演師徒，她自爆4年前未能跟對方合作引以為憾，今次開劇前因腳傷險再錯失機會。她稱讚前輩身上有光環，自己就算撐着拐杖也要堅持接拍。

王君馨在無綫新劇《我家無難事》中喜跟鮑起靜結緣，感覺猶如中頭獎。原來2人數年前有機會合作，可惜擦身而過，今次總算得償所望：「之前鮑姐第一次返無綫拍劇，監製諗住搵我飾演其中一個角色，但我撞咗期，我好傷心，有日喺化妝間見到佢，我向佢自我介紹同講番呢件事，佢話唔緊要，下次一定有機會。當時我心諗都唔知你幾時再返嚟拍劇，都冇乜期望，點知呢套就合作到，仲要咁多對手戲，覺得好圓滿。」她指對方身上有道無形光環令人感到溫暖，跟她做對手戲全無壓力，可以很放鬆地演出。

行路戲 用替身

不過此次合作也非一帆風順，君馨因受傷差點便要辭演：「我拍劇前幾日拍另一套劇時受傷，右腳腳腕兩條韌帶撕裂，一條斷咗，醫生話復原得好都要兩三星期後先可以企，我同監製講如果要換人冇所謂，監製話會諗辦法。最後劇組搵咗個替身畀我，所有行路戲份都係由佢做，真係好神奇，我平時連動作戲都冇替身，何況係文戲？」

她稱最搞笑是劇中的男友楊明有跌落樓梯弄傷右腳的場口，因君馨曾有段時間要撐着拐杖拍戲，楊明竟向她請教如何使用拐杖：「我問編審係咪寫嚟笑我呀，我哋一個真傷一個假傷，大家都分唔到。」