雅虎香港新聞 【電影LOL】余文樂3年來首部新片《怪物先生》做monster hunter
余文樂因為《志明與春嬌》系列而喺兩岸三地彈起，有好幾年唔少港產大片都有佢份，但係呢兩三年好似靜咗落嚟，因為做老公做埋老豆定係疊埋心水打理自家潮牌？原來自2017年嘅《春嬌救志明》、《悟空傳》同《狂獸》之後，余文樂就未有新片推出。而阿樂喺前年拍好嘅《怪物先生》，即將於下星期喺內地三大串流收費平台播放。
《怪物先生》卡士陣容絕對唔弱，阿樂之外嘅男女主角都係影帝影后級人馬！女主角有憑《踏血尋梅》而一鳴驚人嘅春夏，以及三奪香港電影金像獎嘅影后惠英紅。同片的內地演員涂們2017年以《老獸》榮獲金馬影帝。
故事講述季末（春夏飾）從小就因為能看見「怪物」而被視作異類，直到有日佢喺打工嘅超市再次見到「怪物」，並且神奇地遇上「怪物獵人」猛哥（余文樂飾），先至發現原來世界上真係有「怪物」存在，佢地因此捲入一場風波……到底點樣喺內地審查制度之下，令「怪物」呢個題材過到關，並且拍出奇幻色彩，相信會係呢套戲嘅重點。
《怪物先生》改編自美國奇幻小說作家 A. Lee Martinez 作品Monster，曾執導《全力扣殺》嘅導演黃智亨本身亦主理過唔少港片嘅視覺效果場面，揀得呢本小說改編當然係因為原著富有想像力嘅劇情。
電影宣傳文案話《怪物先生》係「第一部於三大視頻平台同步上線的PVOD(付費收看，Premium video-on-demand)全新發行模式影片」，一早有呢個安排定係受疫情影響就不得而知。至於票價，有平台嘅收費係24蚊人仔，會員半價，計落平過喺內地戲院入場睇。相信其他有意以呢個模式放映嘅片主，都會望實套戲嘅串流收入再作部署。
更多電影文章
【電影LOL】「話題女王」劉曉慶又有是非 涉侵權搶拍作家三毛生平電影
【電影LOL】奇洛李維斯越殺越有 《殺神John Wick》系列收得 第4、5集一次過開拍
【電影LOL】冇套收得但係長拍長有 「景甜第二」李一桐又有新戲
